Posts Tagged With: સાઈકિક

શું તમે સાઈકિક છો? (૧૧) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

લેખ ક્રમાંક 42થી શરૂ થયેલી અતીન્દ્રિય શક્તિઓની આ લેખમાળા દરમ્યાન ગત લેખમાં સાઈકોગ્રાફિ અથવા ઑટોમૅટિક રાઇટિંગ તરીકે ઓળખાતા સાઈકિક પાવર વિષે થોડી સમજણ લીધી. તેમાં આગળ વધીએ.

સાઈકોગ્રાફિ દ્વારા રચાયેલ એક અદ્વિતીય પુસ્તકનાં લખાણ દરમ્યાનની ઘટનાઓ અને પ્રિન્ટિંગ સાથે ભાગ્યજોગે હું અત્યંત નજીકથી સંકળાયેલ છું. વિષયને વધુ ગહેરાઈથી સમજવા માટે તેની રસપ્રદ વાત કરીએ. જયારે આ પુસ્તક લખાવાનું હતું ત્યારે તે પુસ્તકની લેખિકા અને મારી મિત્ર જેકલીન રીપ્સ્ટેઇનનાં ગળામાં અચાનક તકલીફ શરૂ થઈ. ધીરે-ધીરે તેનો અવાજ તદ્દન બંધ થઈ ગયો. એક્સપર્ટ ડોક્ટર્સ કંઈ કરી શક્યા નહિ. તે દરમ્યાન આ પુસ્તક લખાવાનું ચાલુ થયું. બોલવાનું બંધ હતું તેથી સંપૂર્ણ ધ્યાન આ રચના પર જ હતું. પુસ્તક પૂર્ણ થયું ત્યાર બાદ કુદરતી રીતે જ અવાજ ફરીથી પહેલાં જેવો જ થઈ ગયો, જાણે કુદરતનો નિર્દેશ હતો કે આ કાર્ય દરમ્યાન તેણે સંપૂર્ણ ધ્યાન લખાણ પર જ આપવાનું છે. જેકલીનને બહુ નજીકથી જાણતો હોવાથી પુસ્તક વાંચતી વખતે અનેક જગ્યાએ ખ્યાલ આવે છે કે અમુક લખાણ જેકલીનનું હોઈ શકે નહિ, તે દૈવી અવતરણ છે. એક જુદી જ ચેતનાના સ્તર પરથી પુસ્તક લખાયું છે. પુસ્તકનું નામ છે ‘The Art of Healing Art’. મારા એક કલાપ્રેમી મિત્ર-કમ-કલીગની લાગણીઓ તે પુસ્તકમાં જેકલીન દ્વારા દોરાયેલ પેઈન્ટિંગ્સ જોઈને એ રીતે બહાર આવેલી કે ભાવાવેશમાં તેમની આંખો અશ્રુભીની થઈ ગયેલી. પુસ્તકનું નામ સાર્થક થયું તેમ કહી શકાય કારણ કે ‘રડવું’ તે પણ હીલિંગનો હિસ્સો છે.

સાઈકોગ્રાફિ શક્તિ કોઈ વ્યક્તિમાં સ્વાભાવિક રૂપથી જ હોય. અન્ય લોકો તેને વિકસાવી શકે. દરેક વ્યક્તિમાં અલગ-અલગ માત્રામાં આ પ્રકારની શક્તિઓ તો હોય જ છે. દરેક વ્યક્તિ એક જ આકાશ નીચે, એક જ સૂર્યની ઊર્જા અને એક જ ચંદ્રની શીતળતા લઈ જીવે છે. માટે મજબૂત ઈરાદો, યોગ્ય દિશાના પ્રયત્નો અને થોડી ધીરજનો ત્રિવેણી સંગમ હોય તો બધું શક્ય છે.

સાઈકોગ્રાફિનાં પ્રાપ્તિસ્થાન બે હોઈ શકે.

1) કોઈ એવી શક્તિઓ/આત્માઓ કે જે પૃથ્વીલોક પર કોઈ સંદેશ આપવા માંગતાં હોય. અનેક મહાન ગ્રંથોની/કલાકૃતિઓની રચના આ રીતે થઈ છે તેમ માનવામાં આવે છે. મનુષ્ય પાસે અગણિત વિષયનું ઊંડું જ્ઞાન કુદરત તરફથી આવતું જ રહેતું હોય છે. વિચારોની દુનિયામાં સતત ખોવાયેલ આપણે આ જ્ઞાન પર ધ્યાન આપી શકતા નથી. ચેતનાના રોજબરોજના સામાન્ય સ્તરથી આ જ્ઞાન સુધી પહોંચવું અશક્ય છે. જયારે મનુષ્ય સ્વાભાવિક રીતે અથવા થોડા પ્રયત્નો બાદ એ સ્તર સુધી પહોંચે ત્યારે બ્રહ્માંડનાં આંદોલનોનું તેને અર્થઘટન થઈ જાય છે, મળે છે જ્ઞાનનો અપ્રતિમ ખજાનો, જન્મ લે છે સાઈકોગ્રાફિ.

2) હવે વધુ અને વધુ લોકો અર્ધજાગૃત મનની શક્તિઓ વિષે સમજણ કેળવતા થયા છે. મનુષ્યનું જાગૃત મન તો 10% કાર્ય જ કરે છે. ખરેખર તો તે અર્ધજાગૃત મનનું ગુલામ છે જ્યાં માહિતીના, અનુભવના, યાદોના, માન્યતાઓના, વિવિધ જગ્યાએથી મેળવેલ જ્ઞાનના ભંડાર ભર્યા છે; જે કંઈ સાંભળ્યું છે, જોયું છે તે તમામની પ્રિન્ટ છે. અનેક સમયે સાઈકોગ્રાફિનો ઉદ્ભવ અહીંથી પણ થઈ શકે. સાઈકોગ્રાફિ ઇરાદાપૂર્વક વિકસાવવી હોય ત્યારે અહીં ભરેલી માહિતીઓનો અગાધ સાગર ઘણું કાર્ય કરાવી શકે. આ થયું સાઈકોગ્રાફિનું બીજું ઉદ્ભવ સ્થાન.

કોઈ પણ કાર્ય કરીએ ત્યારે એ વિચાર તો આવે કે તે કાર્યને કારણે ફાયદો શું થાય? જયારે પ્રયત્નપૂર્વક સાઈકોગ્રાફિ વિકસાવવાની વાત કરીએ, સમય આપીએ, મહેનત કરીએ, પરિણામ માટે ધીરજ રાખીએ તો તે બધું કરતાં પહેલાં સાઈકોગ્રાફિના ફાયદા તો સમજવા જોઈએ. ફાયદાઓ અનેક છે. એક નજર નાખીએ.

1) બ્રહ્માંડમાંથી અનેક સંદેશ સદૈવ વહેતા હોય છે. મોટા ભાગના લોકો પોતાના વિચારોમાં (દિવસના આશરે 60,000) એટલા ગૂંચવાયેલ હોય છે કે આ સંદેશની ફ્રીક્વન્સી પકડી શકતા નથી. સંદેશ મળી જાય તો પણ તેની પર સંદેહ કરે છે. જયારે સાઈકોગ્રાફિ માટે ખાસ પ્રયત્ન કરીએ ત્યારે આવા સંદેશ આંતરી શકવાની શક્યતા વધુ રહે છે. આ સંદેશ ચેતવણી હોઈ શકે, વ્યક્તિની આધ્યાત્મિક અથવા સર્વાંગી ઉન્નતિ માટે હોઈ શકે કે જનસામાન્યના ભલા માટે હોઈ શકે. જયારે વ્યક્તિ કોશિશ કરે અને સંદેશ આવે તો પણ શરૂઆતમાં તો કહેવાતી બુદ્ધિ અથવા ઈગો તેને માનવાનો ઇન્કાર કરી દે. ખરેખર તો આ જ સમય છે સ્વનિરીક્ષણનો.

2) હીલિંગ મોડાલીટી:

દરેક રોગ આખરે તો સાઈકોસોમેટિક છે તે આધુનિક વિજ્ઞાને પણ સ્વીકારી લીધું છે. દરેક લાગણીઓની શરીર પર અસર છે. નકારાત્મક લાગણીઓ લાંબો સમય મનમાં ધરબાયેલી રહે ત્યારે અંદર જ ધમાચકડી બોલાવી શરીરના અંગોને તકલીફ આપે છે, વિવિધ રોગના સ્વરૂપે બહાર આવે છે. સાઈકોગ્રાફિની પ્રેક્ટિસ દરમ્યાન નોંધાયેલા દાખલાઓ છે કે જેમાં મનના ઊંડા પટારામાં મૂકેલી લાગણીઓ અલાઉદ્દીનના જિનની માફક બહાર આવે, વ્યક્તિને સમજણ પણ ન પડે કે તે શા માટે રડે છે અને છતાં તે અનહદ રડે અને અંતમાં રોગ ભાગી જાય.

ભારતીય નેવીમાં ૩૦ વર્ષ સુધી ડોક્ટર તરીકે સેવી આપી ચૂકેલા એક ડો. ઉર્વશી ટંડન છે. તેમના દર્દીઓની સારવાર વખતે તે સાઈકોગ્રાફિ દ્વારા માર્ગદર્શન મેળવે છે. તેમના દ્વારા eShe મેગેઝીનમાં લખાયેલો લેખ https://issuu.com/eshemagazine/docs/eshe_mar_2018 (Page 44)પર વાંચી શકશો.

3) લેખકો અથવા તો લેખક બનવાની અભિલાષા ધરાવતા લોકો માટે તો આ વરદાન છે. લેખન એક સર્જનત્મક પ્રક્રિયા છે – નવલકથા, લેખ, કવિતા, નાટકની સ્ક્રિપ્ટ કે કંઈ પણ. ઘણા લોકો એવા હોઈ શકે કે જેમને લેખનકાર્ય કરવાની ઇચ્છા હોય પરંતુ કઈ રીતે લખવું તે વિષે અસમંજસમાં હોય. સાઈકોગ્રાફિ અહીં મદદે આવશે. શાંતિથી બેસી ફક્ત પોતાના આધ્યાત્મિક પથદર્શકો અને કુદરતની શક્તિને પ્રાર્થના કરવાની રહેશે અને બની શકે કે લખાણ ચાલુ થઈ જાય. ડાબા મગજની તાર્કિક શક્તિઓની જરૂર આ માટે નહિ પડે.

4) જીવનના કોઈ પણ ક્ષેત્રમાં આ શક્તિ કામ આવશે. દરેક વ્યક્તિને ભય, શંકા, વિશ્વાસનો અભાવ, ‘લોકો શું કહેશે’ તેવો ભાવ વિગેરે વિવિધ માનસિક અવરોધો હોય કે જે તેને નવા અને સર્જનાત્મક વિચારો તરફ લઈ જતા રોકે, પરિણામે વિકાસ અવરોધાય. સાઈકોગ્રાફિની પ્રેક્ટિસ દરમ્યાન જેવું મગજ ખાલી કરી કુદરતને અને આધ્યાત્મિક પથદર્શકોને સાંભળવાની કોશિશ કરીએ કે કંઈ નવા વિચારો આવી શકે જે વ્યવસાયમાં, કૌટુમ્બિક સમસ્યાઓમાં, સર્જનકાર્યમાં કે સ્વવિકાસમાં અત્યંત સહાયક નીવડી શકે.

5) બ્રહ્માંડમાં અનેક પ્રકારનું જ્ઞાન પથરાયેલું પડ્યું છે. સમાજના તજજ્ઞોના અને અન્યોના વિચારોના પ્રવાહ તો ખરા જ, સાથે-સાથે જેમણે દેહ છોડી દીધો હોય તેવા મહાત્માઓ, વિદ્વાનો, વૈજ્ઞાનિકોની ચેતના પણ તેમાં ભળેલી હોય. આ સામૂહિક ચેતના – કલેક્ટિવ કોન્સીયસનેસનો લાભ સાઈકોગ્રાફિ દ્વારા મળી શકે.

અંતમાં, વર્ષ 2001 દરમ્યાન મેં ‘રેકી – એક અધ્યયન’ નામનો એક થીસીસ લખેલો છે. જે સંજોગોમાં અને જે પ્રમાણે તે લખાયો તે જોઈને મારું માનવું છે કે તે પણ ‘સાઈકોગ્રાફિ’ હતી. લખવાનું મારું કોઈ આયોજન હતું નહિ. અચાનક તાવ આવ્યો, થર્મોમીટરનો પારો 101/102 વચ્ચે પહોંચતો હતો. માટે હું ઑફિસે જવાને બદલે રજા પર રહ્યો. વિચાર ઉદ્ભવ્યો કે ઘરમાં છું તો ‘રેકી’ વિષે લખું. તે વર્ષોમાં રેકી વિષે ગુજરાતીમાં વિગતવાર અને વ્યવસ્થિત ઉપલબ્ધ ન હતું. રેકીના સિમ્બોલ્સ પણ મોટા ભાગે ભાગે સિક્રેટ રખાતા. કોઈ શક્તિ મને ઢંઢોળતી હોય તેમ આરામ કરવાને બદલે સ્ટેશનરીની દુકાને પહોંચ્યો, એક રજિસ્ટર અને સારી પેન ખરીદ્યાં. ઘરે આવી લખવાનું ચાલુ કર્યું. 1978 બાદ કદી ગુજરાતી લખ્યું ન હતું. શંકા હતી કે ગુજરાતી હસ્તાક્ષર પણ હવે તો કોને ખબર કેવા થશે, લાબું લખવું ફાવશે કે કેમ. હકીકત એ બની કે પેન કાગળ પર સડસડાટ દોડવા માંડી, કોઈ જ પ્રકારના રફ વર્ક વિના જ ફૂલ સ્કેઇપ રજિસ્ટરનાં મોટાં 61 પાનાંનો તે થીસીસ 3 દિવસમાં લખાઈ ગયો, સંપૂર્ણ લખાણમાં લગભગ કોઈ જગ્યાએ છેકછાક નથી, હસ્તાક્ષર વર્ષો પહેલાં હતા તેટલા જ સારા રહ્યા. ત્રણેય દિવસ તાવ તો હતો જ. લખાણ વિષે વિચારો એટલી પ્રચુર માત્રામાં આવતા હતા કે લખ્યું તેટલું જ બીજું તેમાં ઉમેરી શક્યો હોત. પરંતુ તાવ ઉતરતાં ફરી ઓફિસ જવાનું ચાલુ કર્યું. તે પહેલાં યોગ્ય પોઇન્ટ પર થીસીસ પૂરો કર્યો. તે થીસીસની 13.03.2001ના રોજ લખેલી પ્રસ્તાવના આ સાથે મૂકું છું જેના પરથી સંજોગોનો થોડો ખ્યાલ આવશે. સામાન્ય રીતે કોઈ લેખ લખવામાં 5/6 કલાકથી લઈને 10 કલાકનો સમય પણ જોઈએ. તેને બદલે 3 દિવસમાં પુસ્તક થઈ શકે તેટલું લાબું, વ્યવસ્થિત, હસ્તલિખિત લખાણ, કોઈ છેકછાક કે રફ વર્ક વગર, એક સામાન્યથી અલગ વિષય પર, શરીરમાં તાવ સાથે, એ ભાષામાં કે જે માતૃભાષા જરૂરથી છે પણ તેમાં પાછલાં 13 વર્ષમાં એક અક્ષર પણ પાડ્યો નથી – આ બધા સંજોગોને લક્ષ્યમાં લેતાં મારું માનવું છે કે આ ‘સાઈકોગ્રાફિ’ જ હતી.

ઑટોમૅટિક રાઇટિંગ સ્કિલ કઈ રીતે વિકસાવી શકાય, સાઈકોગ્રાફીના નિષ્ણાતો પાસેથી શું માર્ગદર્શન મેળવી શકાય, તેવું માર્ગદર્શન કોણ આપી શકે તે બધા મુદ્દા હવે પછીના લેખમાં આવરી લઈ સાઈકોગ્રાફિ વિષયની ચર્ચા પૂર્ણ કરીશું.

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૧૦) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

આ લેખમાળા 50 હપ્તા પૂરા કરી 51મા હપ્તામાં પ્રવેશી રહી છે ત્યારે અત્યાર સુધી કરેલી ચર્ચાનું વિહંગાવલોકન કરીએ.

તબક્કો 1: લેખ ક્રમાંક 1 થી 21 – ઓરા, કુંડલિની, નાડી, ચક્રો વિગેરે

તબક્કો 2: લેખ ક્રમાંક 22 થી 41 – ધ્યાન અંગે વિસ્તૃત ચર્ચા (આ વિષય અંગેની ભ્રમણાઓ, વૈજ્ઞાનિક રીતે સિદ્ધ થયેલા ફાયદા, હોર્મોન્સ – મગજના તરંગો વિગેરેમાં થતા ફેરફારો, વધુ સારું ધ્યાન કઈ રીતે થઈ શકે તે અંગેનાં સૂચનો વિગેરે)

તબક્કો 3 (હજુ ચાલુ) : લેખ ક્રમાંક 42 થી 50 – વિવિધ અતીન્દ્રિય શક્તિઓ

ત્રીજા તબક્કામાં અત્યાર સુધી કઈ શક્તિઓ વિષે જાણ્યું?

1) કલેયરવોયન્સ: આંખ બંધ હોય તો પણ જોઈ શકાય, દૂરનાં અંતરનાં, ભવિષ્યનાં કે ભૂતકાળનાં દૃશ્યો પણ નિહાળી શકાય તેવી શક્તિ.

2) કલેયરએમ્પથી: એવી અતીન્દ્રિય શક્તિ – ESP(Extra Sensory Perception) કે વ્યક્તિ બીજી વ્યક્તિનાં શારીરિક- માનસિક સ્પંદનો તથા વિચારો એ રીતે અનુભવે જાણે તે પોતે એ જ વ્યક્તિ હોય; હજારો માઈલ દૂર બેઠેલ વ્યક્તિનાં શારીરિક/માનસિક સ્પંદનો પણ જાણે, ખુદના જ છે તેમ અનુભવે.

3) કલેયરઓડિયન્સ: સામાન્ય વ્યક્તિથી, સામાન્ય સંજોગોમાં, શ્રવણેન્દ્રિય (કાન) દ્વારા ન સાંભળી શકાય તેવા દૂરના અથવા અન્ય લોકમાંથી આવતા હોય તેવા ગેબી અવાજો સાંભળી શકવાની અતીન્દ્રિય શક્તિ.

4) ક્લેયરટેન્જીયન્સ/સાઈકોમેટ્રી: એવી અતીન્દ્રિય શક્તિ કે કોઈ પણ વસ્તુને સ્પર્શ કરતાં જ જાણી શકાય કે તેનો ઇતિહાસ શું છે, ક્યા પ્રકારની વ્યક્તિઓ દ્વારા એનો ઉપયોગ થયો છે વિગેરે. તે વસ્તુનો ઉપયોગ શા માટે થયો હતો, તેનો માલિક કોણ હતો, એ વસ્તુ જેની પાસે હતી તેને શું થયું હશે (જેમ કે તેને અકસ્માત થયો હોય) તે ખ્યાલ પણ આવી જાય. વધુ શક્તિશાળી સાઈકિકને તે વસ્તુનો ઉપયોગ કરેલ વ્યક્તિના વર્તમાન વિષે જાણ થઈ જાય, તે વ્યક્તિના વ્યક્તિત્વ વિષે પણ ખ્યાલ આવી જાય.

હવે સમજીએ ‘સાઈકોગ્રાફિ ‘ અથવા ‘ઑટોમૅટિક રાઇટિંગ’ તરીકે ઓળખાતી શક્તિને.

નીચેના શબ્દો વાંચીએ.

“હું 3.00 વાગ્યા આસપાસ ઊઠું પછી ખબર નહિ, કોઈ શક્તિ મારી પાસે લખાવી રહી હતી. હું બ્રશ કરી શકું નહિ, અન્ય કોઈ નિત્યક્રમ કરી શકું નહિ, મારે લખવા બેસવું જ પડે. લખવાની આદત વર્ષોથી છૂટી ગઈ છે, લખતાં-લખતાં હાથ દુઃખી જાય તો ડાબા હાથથી જમણો હાથ પકડીને પણ લખવું જ પડે. એક હદ સુધીનું લખાણ સમાપ્ત થાય ત્યાર બાદ જ હું બીજા કાર્ય કરી શકું.”

ઉપરોક્ત શબ્દો છે એક સિદ્ધ સંતના. વર્ષ 2007માં તેમની સાથે ગુજારવા મળેલી અમૂલ્ય પળોમાં તેમની જ પાસેથી સાંભળેલો તેમનો અનુભવ તેમના જ શબ્દો યાદ કરી અહીં રજૂ કર્યો છે. તે સંત ૪૫ દિવસ સુધી એકાંતમાં ગહન ધ્યાનમાં રહ્યા બાદ બહાર આવેલા. તેમનો નિત્યક્રમ સવારે 3.30 વાગ્યે ઊઠી ધ્યાન કરવાનો સામાન્ય દિવસોમાં પણ છે. ગહન ધ્યાન દરમ્યાન તો વિશેષ હોય. આમ છતાં ધ્યાનની સાથે-સાથે કોઈ શક્તિઓને તેમની પાસે લખાણ લખાવડાવવું હશે. તેથી ઉપરોક્ત ઘટના બની. પરિણામે રચના થઈ એક દિવ્ય ગ્રંથની જે તેમની આત્મકથા છે, જેમાં તેમણે હિમાલયમાં કરેલી કઠિન સાધનાના અનુભવોનું જીવંત નિરૂપણ છે, ગ્રંથના અતિ ઉચ્ચ વાઈબ્રેશન છે, ગ્રંથના ઓરાની તસ્વીર તેની ગવાહી છે (સાથેનાં ચિત્રમાં પહેલા અને બીજા ભાગનો ઓરા જોઈ શકો છો). ગ્રંથનું નામ છે ‘हिमालय का समर्पण योग’ . હવે તો તેના 6 ભાગ બહાર પડી ચૂક્યા છે. રસપ્રદ વાત એ છે કે ચોથા ભાગમાં જૈનદર્શન અને નવકાર મંત્ર વિષે અત્યંત વિસ્તૃત વર્ણન છે જે અંગે તેમનો કોઈ અભ્યાસ હતો જ નહિ. કોઈ શક્તિઓ જ તેમની પાસે લખાવી ગઈ.

“મેં પેઇન્ટીંગની કોઈ તાલીમ લીધી નથી. જયારે મારા દ્વારા કોઈ પેઇન્ટિંગ થવાનું હોય ત્યારે અચાનક જ મને હાથમાં બ્રશ લેવાનું મન થાય, કેનવાસ સામે નજર કરું, મારી બંને આંખ ફરકવા લાગે, બ્રશ જાણે આપોઆપ કેનવાસ પર ફરવા લાગે અને આખરે કોઈ એવું પેઇન્ટિંગ બને કે જે વિષે મેં પહેલેથી કંઈ વિચાર્યું ન હોય.”

આ શબ્દો છે લેખ ક્રમાંક ૧માં જેનો ઉલ્લેખ કરેલો તે વિશ્વવિખ્યાત આર્ટિસ્ટ અને United Nations Envoy for Peace Through Art જેકલીન રીપ્સ્ટેઇનના, જેનાં પેઈન્ટિંગ્સ અમેરિકાની હોસ્પિટલમાં પણ રાખવામાં આવે છે કારણ કે તેમાંથી પ્રવાહિત થતી Healing એનર્જી અત્યંત પ્રસિદ્ધ વૈજ્ઞાનિકોએ માપી છે (વિગતો માટે: www.jacquelineripstein.com). સમાન વિષયમાં રસ હોવાથી જેકલીન સાથે મારી અંગત મિત્રતા છે. પરિણામે મારા ઘરમાં જ આમને-સામને બેસી આ અંગે વિસ્તૃત ચર્ચા તેની સાથે થઈ છે. તેનું એક અતિ પ્રસિદ્ધ પેઇન્ટિંગ ‘Heaven to Earth’ સાથેના ચિત્રમાં જોઈ શકો છો, જેના વાઈબ્રેશન્સની સીધી અસર હૃદયચક્ર પર છે. વિશેષતા તેની વધુમાં એ છે કે અજવાળામાં જૂદું દેખાય છે, અંધારામાં જૂદું અને UV Light સાથે જૂદું. દરેક વખતે એનર્જી પણ જૂદા-જૂદા હર્ટઝની છે તે માપવામાં આવ્યું છે.

આ પ્રમાણે બીજા જ ડિમેન્શનમાંથી પ્રાપ્ત થતા હોય તેવા દિવ્ય સંદેશ કે અપ્રતિમ કળાનું ધરતી પર અવતરણ થઈ શકે તેવી અતીન્દ્રિય શક્તિ એટલે ‘સાઈકોગ્રાફિ’ અથવા ‘Automatic Writing’. આ પ્રકારનું લખાણ/કળા આપોઆપ ઊતરી શકે, થોડા પ્રયત્નો કરીએ તો માધ્યમ બની ઉતારી પણ શકાય. માત્ર લખાણ જ નહિ, દિવ્ય સંગીત પણ ઊતરી શકે અને અદભુત ચિત્રકામ પણ.

મૃત્યુનાં 250 વર્ષ પછી પણ પોતાની સિમ્ફની દ્વારા અમર થઈ ગયા છે તેવા કમ્પોઝર મોઝાર્ટના નામથી બધા પરિચિત હશે. તેમના દ્વારા રચિત સિમ્ફની શરીરના રોમ-રોમને આંદોલિત કરી મૂકે છે. આ સિમ્ફનીની અસર પાણી પર પણ છે તેવું વૈજ્ઞાનિક મસારુ ઈમોટોના પ્રયોગો દ્વારા સાબિત થયું છે. સ્વાભાવિક છે કે શરીરમાં 70% જલતત્ત્વ છે તે પર તો અસર કરે જ. આ સિમ્ફની પણ સાઈકોગ્રાફિ દ્વારા ઉદ્ભવી છે , તે સાઈકિક જગતથી પરિચિત લોકોમાં સર્વવિદિત છે. એટલું જ નહિ પરંતુ મોઝાર્ટના અવસાન બાદ તેમણે અમુક સંગીતકારો દ્વારા સંગીત કમ્પોઝ કરાવ્યું હોય તેવા કિસ્સા પણ બહાર આવ્યા છે. એટલે કે સાઈકોગ્રાફિની પણ સાઈકોગ્રાફિ.

સાઈકોગ્રાફીને વિસ્તારથી સમજવા માટે તેના વિવિધ પાસાં તપાસીએ.

1) શબ્દો/કળાનું અવતરણ એ રીતે થાય જાણે કોઈ બીજા જ લોકમાંથી આવતા હોય.

2) આ અવતરણ સમયે જેના પર થતું હોય તે વ્યક્તિની સ્થિતિ ધ્યાન દરમ્યાન બનતી ટ્રાન્સની સ્થિતિ જેવી હોય.

3) સાઈકોગ્રાફિ સમયે સાઈકિકની સ્થિતિ ‘માધ્યમ’ જેવી હોય. અન્ય કોઈનો સંદેશ તે ચેનલ કરે, પ્રવાહિત કરે.

4) લખાણ/કળાની ઝડપ સામાન્ય કરતાં વધુ હોય, કારણ કે તે કામ ‘કોઈ કરાવી રહ્યું છે,’ જે કરી રહ્યું છે તેણે કંઈ વિચારવાની જરૂરત રહેતી નથી.

5) આ પ્રકારનું કાર્ય અત્યંત વિગતવાર હોય. લખાણમાં વર્ણન અત્યંત ચોક્કસ હોય. ગમે તેટલી જૂની ઘટનાનું વર્ણન આવે તો પણ તે એટલું બધું તાદૃશ્ય હોય છે જાણે આ મિનિટે નજર સમક્ષ બની રહ્યું હોય અને લખી રહ્યા હોઈએ. ‘हिमालय का समर्पण योग’ પુસ્તકના પહેલા ભાગમાંથી લીધેલ એક વર્ણન (ચિત્ર) પરથી આ ખ્યાલ આવશે. જે ઘટનાનું વર્ણન તેમાં થયું છે તેના આશરે 30 વર્ષ બાદ આ લખાણ થયું છે.

6) આ પ્રકારના લખાણમાં હસ્તાક્ષર સામાન્ય કરતાં થોડા મોટા હોય છે.

7) આ પ્રક્રિયા દરમ્યાન વ્યક્તિને ઘણી વખત હાથમાં ઝણઝણાટી અથવા વાઈબ્રેશન મહેસૂસ થાય છે.

8) સાઈકોગ્રાફિનો અનુભવ ટાઈપ કરતી વખતે પણ થઈ શકે.

સામાન્ય રીતે સાઈકોગ્રાફિની વ્યાખ્યા કરતી વખતે લખાણ તેમ જ કળાને આવરી લેવામાં આવે છે. પરંતુ વ્યવસાયિક કૌશલ્ય દરમ્યાન પણ આ પ્રકારે ઉચ્ચ શક્તિઓ કાર્ય કરાવી જતી હોય તેવી ઘટનાઓ બને છે, જેમ કે આવો અનુભવ ડોક્ટરને ઓપરેશન કરતી વખતે પણ થઈ શકે. એક વૈજ્ઞાનિક મિત્રની પુત્રીને એપેન્ડિક્સનો દુખાવો ઉપડ્યો. નાજુક સ્થિતિ થઈ ગઈ. જો તાત્કાલિક સર્જરી ન કરે તો કંઈ પણ થઈ શકે તેવી પરિસ્થિતિ હતી. મુંબઈ નાણાવટી હોસ્પિટલમાં લઈ ગયા. ઓપરેશન થિએટરમાં દર્દીને લઈ જાય ત્યાર બાદ તો કુટુંબીજનો પાસે રાહ હોવાનો અને પ્રાર્થના કરવાનો જ વિકલ્પ રહે છે. તે મુજબ દર્દીના માતા-પિતાએ બહાર ઇન્તઝાર કરતાં-કરતાં પ્રાર્થના શરૂ કરી. કહેવામાં આવેલું કે ખૂબ જટીલ ઓપરેશન હોવાથી થોડી વાર લાગશે. ધાર્યા કરતાં ઓપરેશન વહેલું પૂરું થયું. મૂંઝાયેલ ડોક્ટર બહાર આવ્યા. તેમણે કહ્યું: “ઓપરેશન તો અત્યંત સારું થયું છે પરંતુ મારો અનુભવ એ છે કે કોઈ મને ઓપરેશન કરાવતું હતું, સૂચના આપતું હતું તે મુજબ હું કરતો ગયો.” વર્ષ ૨૦૦૨ દરમ્યાન ‘મધુ ચૈતન્ય’ નામક મેગેઝીનમાં પ્રકાશિત થયેલો તે મિત્રનો અનુભવ સાથેના ચિત્રમાં વાંચી શકશો.

આ ઘટના પરથી સમજી શકાય કે અદૃશ્ય શક્તિઓ જેને કોઈ ને કોઈ નામથી લગભગ તમામ લોકો માને છે (કોરોનાકાળમાં પ્રાર્થના પણ કરે છે) તે લખાવી શકે, અદ્ભુત કળા જન્માવી શકે, ઓપરેશન કરાવી શકે, કોઈ પણ રીતે બચાવી શકે – ટૂંકમાં, કંઈ પણ કરાવી શકે.

સાઈકોગ્રાફિ દ્વારા લખાયેલાં અન્ય અત્યંત પ્રસિદ્ધ પુસ્તકોનાં નામ અહીં છે.

1) Conversations with God (by Neale Donald Walsch)

2) A Course In Miracles (by Helen Schucman). આ પુસ્તક પરથી TV Show અને ફિલ્મ પણ બની ચૂક્યાં છે.

3) The Afterlife of Billy Fingers: How My Bad-Boy Brother Proved to Me There’s Life After Death (by Annie Kagan) . નોંધપાત્ર વાત અહીં એ છે કે લેખિકા એન્ની કોઈ સાઈકિક નથી, લેખિકા જરૂર છે. તેના મૃત્યુ પામેલા ભાઈએ તેની પાસે આ લખાવડાવ્યું છે. 2013માં લખાયેલી પુસ્તિકા છે, PDF આ સાથે સામેલ છે. https://redwheelweiser.com/downloads/afterlifebilly.pdf પરથી પ્રાપ્ત થઈ શકે છે. અર્થઘટન એ થાય કે કોઈ પણ વ્યક્તિ આ પ્રમાણે માધ્યમ બની શકે.

ભ્રમણાઓ:

સાઈકોગ્રાફિ અંગે અમુક ભ્રમણાઓ / ખોટા ખ્યાલો પણ છે. થોડા જોઈએ.

1) આ પ્રકારનું લખાણ બંધ આંખોથી થાય.

કોઈ વ્યક્તિ આ લખાણ વખતે આંખો થોડો સમય બંધ કરે, અંત:સ્ફુરણા પ્રાપ્ત કરે, આંખો ખોલે, ફરી લખે તેવું બને. પરંતુ સદંતર આંખો બંધ હોય અને લખાણ ઊતરતું જાય તેવું નથી.

2) હાથ આપોઆપ ચાલવા માંડે અને લખાણ લખાતું જાય.

આ પણ ખોટી માન્યતા છે. એમ બને છે કે આ પ્રકારનું લખાણ કોઈ ચેકચાક વગરનું સાફસૂથરું, ભૂલ વગર લખાતું જાય કારણ કે વિચારવાની જરૂર આ દરમ્યાન ન પડે અથવા બહુ ઓછી પડે. પરંતુ એમ માનવું ભૂલ ભરેલું છે કે હાથમાં જાદુઈ રીતે પેન આવી જાય અને પેન કાગળ પર દોડવા માંડે. એવું ફક્ત કોઈ વખત જ બને છે કે જયારે કોઈની સહી કરવા માટે સાઈકોગ્રાફિ થકી પ્રયત્ન કર્યો હોય. બીજા શબ્દોમાં, ત્યારે બને કે જયારે કોઈ શક્તિને કે આત્માને આવાહ્ન કરી પ્રાર્થના કરી હોય કે મારે કોઈ ખાસ વ્યક્તિની સહી કરવી છે.

સાઈકોગ્રાફીના ફાયદા શું, ઑટોમૅટિક રાઇટિંગ સ્કિલ કઈ રીતે વિકસાવી શકાય, સાઈકોગ્રાફીના નિષ્ણાતો પાસેથી શું માર્ગદર્શન મેળવી શકાય, તેવું માર્ગદર્શન કોણ આપી શકે તે બધા મુદ્દા હવે પછી.

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૯) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

લેખ 6,7,8 માં સાઈકોમેટ્રી વિષે ઘણું જાણ્યું. આ અતીન્દ્રિય શક્તિને વિગતથી જાણવાની જરૂર એ માટે છે કે તે સૌથી પ્રાથમિક અતીન્દ્રિય શક્તિ ગણી શકાય, સરળતાથી વિકસાવી શકાય, શીખવા માટે જે કરીએ તે સમૂહમાં રમતના રૂપમાં પણ કરી શકાય, રોજબરોજની જિંદગીમાં તેનો ઘણી જગ્યાએ ઉપયોગ થઈ શકે. આ લેખમાં નીચેના મુદ્દા તપાસીશું.

1) વાચકોના પ્રશ્નો

2) સાઈકિક વાયરસ

૩) મારામાં સાઈકોમેટ્રી શીખવાની સંભાવના છે?

4) કઈ રીતે શીખી શકાય?

5) આ શક્તિ દ્વારા રોજબરોજની જિંદગીમાં શું શીખ (Learning Points) મળે?

6) પ્રખ્યાત સાઈકિક – નોરિન રેનિયર (હાલમાં જીવંત)

એક વાચક દ્વારા વ્યક્ત થયેલી જિજ્ઞાસા તપાસીએ જે વિષયને થોડો વધુ સ્પષ્ટ કરશે.

1) આપણે ત્યાં એવી માન્યતા છે કે કુદરતે દીધેલ અતિન્દ્રિય શક્તિઓનો અર્થોપાર્જન માટે ઉપયોગ કરવો જોઈએ નહીં. અન્યથા એ ક્ષીણ થતી ચાલે. શું એવું છે ખરું?

અનુભવ આ માન્યતાની યથાર્થતાને પડકારે છે. લેખ 8 માં જેનો ઉલ્લેખ કર્યો છે તે વિશ્વવિખ્યાત સાઈકિક બાર્બરા સાથે 2૩.05.2020ના રોજ થયેલી ચેટ અહીં મુકું છે (સ્ક્રીન શોટ જુઓ) જે દર્શાવે છે કે વ્યાવસાયિક સાઈકિક હોવા છતાં તેની શક્તિ વધતી ગઈ છે. ૩5 વર્ષ પહેલાં ખૂન જેવા ગુનાઓ સુલઝાવવા બાર્બરાને વ્યક્તિના ઝવેરાત, ઘડિયાળ, કપડાં જેવી વસ્તુની જરૂર પડતી. હવે તેની શક્તિઓ વધતાં આવી આવશ્યકતા રહેતી નથી. અન્ય સાઈકિક મિત્રોના અનુભવ પણ આવા જ છે.

સાથે-સાથે એ પણ જોવાનું રહ્યું કે સંસાર આધ્યાત્મિક સાધના માટે છોડ્યો હોય, સાધનાના માર્ગમાં સિદ્ધિઓ મળી હોય, તે સંજોગોમાં મૂળ હેતુથી ફંટાઈને અર્થોપાર્જન કે અભિમાન પોષવા માટે સિદ્ધિઓ પર રોકાઈ જઈએ તો રાહ ભટકેલ મુસાફર જેવી સ્થિતિ થઈ શકે. આપણે સંસારી લોકો ખરેખર તો આ વિષે કંઈ ટીકાટિપ્પણ માટે અધિકારી નથી.

2) અતિન્દ્રિય શક્તિઓ શું જીવનભર એમ જ રહે છે? એટલી જ તીક્ષ્ણ રહે?

શક્તિ વધી પણ શકે, ઘટી પણ શકે. વ્યક્તિની સાધનાનાં સાતત્ય, પ્રકાર, વિચારોમાં આવતા બદલાવ, અમુક પ્રકારની ઊર્જા અટકાવવા માટે લીધેલી કાળજી, તે દૂર કરવા માટે લીધેલાં પગલાં, ખુદનો ઓરા શુદ્ધ કરવા માટે લીધેલી દરકાર વિગેરે અનેક પરિબળો પર આ વધઘટનો આધાર છે.

સાઈકોમેટ્રી આનુસંગિક અન્ય પાસાં જોઈએ

સાઈકિક વાઇરસ શું છે?

કોઈ સ્થાયી મિલકત ખરીદીએ ત્યારે ત્યાંની ઊર્જા જાણવી જરૂરી છે. ભૂતકાળમાં ત્યાં કેવા પ્રકારની લાગણીઓ ધરાવતા લોકો રહી ગયા છે, લાગણીઓનો કેવો વારસો છોડી ગયા છે તે જાણવું અત્યંત અગત્યનું છે. ક્યા પ્રકારની ઘટનાઓ ત્યાં બની ચુકી છે તે પણ ખૂબ જ મહત્ત્વ ધરાવે છે. મકાનની દીવાલો અને છત પર, બારણાં પર, ફર્નિચર પર અને સૌથી વધુ દરેક ખૂણાઓમાં લાગણીઓનો કાટમાળ જમા થયેલો હોય છે. આ ભંગારને સાઈકિક વાયરસ કહી શકાય જે વર્ષો બાદ પણ ત્યાં રહેનાર લોકોને અસર કરી શકે, તકલીફ પણ આપી શકે.

ધારો કે એક રાજમહેલ સસ્તી કિંમતે મળે છે. ભૂતકાળમાં ત્યાં અનેક કાવાદાવા થઈ ચુક્યા છે, સત્તા માટે ખૂન પણ થઈ ચુક્યા છે, કોઈ વિલાસી રાજાએ અનેક સ્ત્રીઓ પર અત્યાચાર પણ કર્યા છે. ત્યાં રહેવા જનારને શાંતિ મળવાની શક્યતા કેટલી? અનેક લોકોને, ખાસ કરી ને હિલર્સને તથા નિયમિત ધ્યાન કરનાર લોકોને, સ્થળની ઊર્જાનો તાત્કાલિક ખ્યાલ આવે છે. એક અતિ સેન્સિટિવ મિત્રનો અનુભવ જાણ્યા પરથી આ વસ્તુનો ખ્યાલ આવશે. તેનાં મિત્રદંપતીએ મહેનત કરી અનેક મકાનો જોઈ રાખેલાં, તેમાંથી એક મકાન અત્યંત રૂડું-રૂપાળું હતું, નવું હતું, સારું ઈન્ટીરીઅર કરેલું હતું, ફક્ત રોજિન્દા વપરાશની બેગ લઈ રહેવા જઈ શકાય તેમ હતું. આ સેન્સિટિવ મિત્ર અને તેનાં એટલાં જ સેન્સિટિવ પત્ની તે મકાનમાં દાખલ થયા. તરત જ છાતીમાં ભાર લાગ્યો, મૂંઝવણ થઈ, ખ્યાલ આવ્યો કે મકાનનાં હૃદય ચક્રમાં તકલીફ છે. મકાન બહાર આવ્યા બાદ બંનેએ પોતાનો અનુભવ સરખાવ્યો. એક જ સરખો હતો. તે મકાન સ્વાભાવિક રીતે જ ન ખરીદ્યું. બની શકે કે નવી રહેવા આવનાર વ્યક્તિ અને તેના કુટુંબને તકલીફ પડે. સાઈકોમેટ્રી એક્સપર્ટ અહીં કામ આવી શકે.

એવા સાધનો પણ મળે છે કે જેનાથી કોઈ સ્થળની ઊર્જા માપી શકાય. મારા એક મિત્રના વિશાળ બંગલામાં એક મશીનથી ઊર્જા માપ્યા બાદ તોડફોડ કરેલી છે. બીજા એક મિત્ર જેને પ્રોપર્ટી ખરીદવાનો ગાંડો શોખ છે તે આ પ્રમાણે મશીનથી ઊર્જા માપ્યા બાદ જ કોઈ પણ પ્રોપર્ટી ખરીદ કરે છે. પ્રોપર્ટી ખરીદતાં પહેલાં જ આશરે 50000 રૂપિયા ઊર્જા જાણવાં માટે ખર્ચે છે. તે કહે છે કે મારે માટે આ ખર્ચ નથી, રોકાણ છે.

મનમાં પ્રશ્ન કદાચ ઉઠે કે શું મારામાં સાઈકોમેટ્રીના લક્ષણ છે? નીચેના પ્રશ્નોના જવાબ ખુદ પાસેથી મેળવવાના રહે – Self Test.

1. ભંગાર ભર્યો હોય તેવી જગ્યામાં અત્યંત અકળામણ અનુભવાય છે? સામાન્ય રીતે બંધિયાર જગ્યાનો ડર ન લાગતો હોય પરંતુ આવી જગ્યામાં લાગે છે? કારણ એ હોઈ શકે કે વિવિધ વસ્તુઓમાંથી આવતી જુદા-જુદા પ્રકારની ઊર્જા વિરોધાભાસી લાગણીઓનાં વમળ અજાણતાં જ પેદા કરતી હોય. વિવિધ રાજકીય પક્ષોનાં અલગ-અલગ સરઘસ એક સાથે પોતપોતાનાં દળનાં સૂત્રોચ્ચાર કરતાં નીકળે તો સાંભળનારને જે અકળામણ થાય તેવી અકળામણ સંવેદનશીલ વ્યક્તિને અહીં થઈ શકે.

2. વપરાયેલી વસ્તુઓનું બઝાર સહન થતું નથી? જેમ કે ચોરબજાર, ગુજરીબજાર, એન્ટિક વસ્તુઓનું બઝાર, હરરાજી વિગેરે. મ્યુઝિયમ આમાં અપવાદ હોઈ શકે કારણ કે સામાન્ય રીતે વિશાળ જગ્યાને કારણે આંદોલનો પ્રસરી ગયા હોય તથા વ્યવસ્થિત ગોઠવણીને કારણે ઊર્જાના અવરોધો-બ્લોકેજ ઉત્પન્ન થતા ન હોય.

3. અન્ય વ્યક્તિનાં કપડાં કે ઝવેરાત પહેરવાથી તકલીફ પડે છે?

4. કોઈની વાપરેલી વસ્તુ વાપર્યા પછી તરત હાથ ધોવાની ઈચ્છા થાય છે?

5. ગૂમ થયેલી અથવા આડી-અવળી મુકાઈ ગયેલી વસ્તુઓ બહુ ઝડપથી શોધી શકું છું?

6. વસ્તુઓ/ઝવેરાત સામે ધીરધારનો ધંધો જ્યાં ચાલતો હોય તેવી જગ્યામાં બહુ અકળામણ થાય છે? આવી જગ્યાએ આવનારી વ્યક્તિ મજબૂરીવશ આવી હોય. તે મજબૂરી અને વસ્તુ સાથેનું તેનું માનસિક જોડાણ – આ બંનેને કારણે નકારાત્મક ઊર્જા ઉદ્ભવે. આવી જ અકળામણ જપ્તિનું કાર્ય થતું હોય તે જગ્યાએ થઈ શકે.

7. કોઈ ચોક્કસ જગ્યાની મુલાકાત લીધી હોય, કોઈને પણ સ્પર્શ ન કર્યો હોય છતાં ઘરે પરત ફરતાં જ સ્નાન કરી લેવાની ઈચ્છા થાય છે? શક્યતા છે કે કોઈ એવી ઊર્જા ગ્રહણ કરી લીધી છે કે જે તાત્કાલિક ફેંકી દેવાની ઈચ્છા થાય છે.

8. એવું બને છે કે અમુક કપડાં ગમે તેટલાં કિંમતી અને આરામદાયક હોય તો પણ પહેરવાનું મન થતું નથી?

સાઈકોમેટ્રી વિકસાવવા માટે શું કરીશું?

અતીન્દ્રિય શક્તિઓ વિકસાવવાના પ્રયત્નોના શ્રીગણેશ કરવા માટે સાઈકોમેટ્રી ઉત્તમ છે. એક તો એ સરળ છે અને વધારામાં જો રસ હોય તો તે પ્રક્રિયા બહુ આનંદદાયક છે. એવું નથી કે પહેલી વારમાં સફળતા મળી જ જાય પણ જૅમ-જૅમ પ્રેક્ટિસ થતી જશે તેમ-તેમ સહેલું લાગશે, ઝડપ પણ આવશે. ફક્ત એટલું ધ્યાન રાખવાનું કે રમત-રમતમાં શીખવાનો પ્રયત્ન કરવાનો, માથા પર મણની શીલા મૂકી હોય તેવા તણાવ સાથે નહિ. કોઈ પણ વ્યક્તિ આ કરી શકે છે. આ પ્રકારની શક્તિ પર વિશ્વાસ અને થાક્યા વગર નિયમિત અભ્યાસ જરૂરી છે. તબક્કાવાર જઈએ. .

હાથ સારી રીતે સાબુથી ધોયા બાદ કોરા કરીએ જેથી બીજેથી ખેંચી લીધેલી ઊર્જા દૂર થાય.

બંને હથેળી એક-બીજા સાથે ઘસીએ.

બંને હાથ છાતી પાસે રાખીએ. હથેળી સામ-સામે, બંને વચ્ચે ૩/4 ઇંચનું અંતર. હવે અત્યંત ધીરેથી બંને હથેળીને એક-બીજાથી દૂર લઇ જઈએ, બંને વચ્ચે દોઢથી બે ફિટનું અંતર રહે તે મુજબ. ફરી ધીરે-ધીરે નજીક લાવીએ. આ પ્રક્રિયા થોડી વાર કરીએ. ખ્યાલ આવશે કે બંને હથેળી વચ્ચે ચુંબકીય ક્ષેત્ર બની રહ્યું છે, તે જ તો છે શરીરમાંથી બહાર નીકળતી ઊર્જા એટલે કે ઈલેક્ટ્રો-મેગ્નેટિક વેઈવ્સ.

કોઈ વસ્તુ હાથમાં પકડીએ – એવી વસ્તુ કે તે કોની છે તે વિષે કોઈ જાણ નથી. કોઈ ઝવેરાત કે ધાતુની વસ્તુ આ માટે શ્રેષ્ઠ છે. જે વસ્તુને પકડીએ તેનું સંપૂર્ણ નિરીક્ષણ કરીએ. રંગ કેવો છે, તેના પર કોઈ પ્રિન્ટ કે નક્સીકામ હોય તો તે – નાનાંમાં નાની દરેક બાબતની નોંધ કરીએ. નોંધ કર્યા બાદ મૉટેથી બોલીએ કે કઈ વસ્તુ છે, કયો રંગ છે વિગેરે.

એકદમ હળવા મન સાથે આ ક્રિયા કરીએ. આંખ બંધ કરીએ.

જે જોઈ ચિત્ર દેખાય, અવાજ સંભળાય, સુગંધ આવે, સ્પંદન ઉઠે તેની માનસિક નોંધ લઈએ.

ખુદને સવાલ પૂછીએ.

1. આ વસ્તુ કોની છે/હતી?

2. તે વસ્તુ જેની હતી તેનું વ્યક્તિત્ત્વ કેવું હતું?

3. આ વસ્તુ તેના માલિક પાસે હતી તે દરમ્યાન તેને કેવા અનુભવ થયા છે?

4. તે વ્યક્તિ જીવંત છે કે મૃત?

લાગણીઓ ધસી આવશે તેવો અનુભવ ઘણી વાર થશે. નફરત, ડર અને પ્રેમ સૌથી વધુ શક્તિશાળી ભાવના ગણાય. સાઈકોમેટ્રી દરમ્યાન પણ સૌથી વધુ આ બહાર આવે. જે કંઈ બહાર આવ્યું તેને નોંધીશુ અને હકીકત સાથે સરખાવીશું.

થોડી વાતોનું ધ્યાન રાખીશું.

સમગ્ર પ્રક્રિયા દરમ્યાન હળવા રહીશું, એક રમત તરીકે પ્રક્રિયાને લઈશું.

ખુલ્લા દિલથી કોઈ પણ જાતની શંકા-કુશંકા કે ડર વગર પ્રક્રિયા કરીશું.

જે કંઈ કરીએ છીએ, જે પરિણામો આવ્યા છે તેનો રેકોર્ડ રાખીશું જેથી ખ્યાલ આવે કે અમુક સમય પછી કેટલી પ્રગ્રતિ થઈ.

ઘણી વખત હાથમાં બહુ પ્રસ્વેદ થઈ શકે. માટે ટીસ્યુ પેપર, નેપકીન વિગેરે બાજુમાં રાખીશું.

શરૂઆતમાં એન્ટિક વસ્તુથી પ્રયત્ન નહિ કરીએ. અનેક વ્યક્તિએ જેનો સ્પર્શ કર્યો હોય તેની ઊર્જા સમજવા માટે થોડા મહાવરાની જરૂર પડે. એક જ વ્યક્તિએ ઉપયોગ કરેલી વસ્તુથી શરૂઆત કરીશું. ઝવેરાત, વાળની લટ, મોબાઈલ ફોન, ફોટોગ્રાફ વિગેરે શરૂઆત કરવાં માટે અનુકૂળ આવશે.

અર્ધજાગૃત મનને શું કરવાનું છે તે આદેશ આપવાથી વધુ સારા પરિણામ મળે. માટે એક માનસિક નીર્ધાર કરીશું કે ‘જે વસ્તુને હું પ્રયોગમાં લઈશ તેની ઊર્જાની છાપનો ખ્યાલ મને આવશે.’

જે સક્રિય હાથ હોય, જેનાથી મોટા ભાગના કાર્ય કરતા હોઈએ તેનાથી વિરુદ્ધના હાથમાં વસ્તુ પકડાવી જોઈએ. તે હાથ ગ્રહણકર્તા હાથ ગણાશે.

તે પદાર્થને પેટ, કપાળ, ગાલ પર સ્પર્શ કરાવીએ. જોઈએ કે વધુ ખ્યાલ શરીરના કયો ભાગ મેળવી રહ્યો છે.

વસ્તુને સ્પર્શ કર્યો તેનાથી સારું લાગ્યું કે ખરાબ – પ્રથમ તે નોંધ કરવાની. એ જોવાનું કે સ્પર્શ દ્વારા ઝણઝણાટી થઈ? ઉષ્ણતા મેહસૂસ થઈ? શીતળતાનો અનુભવ થયો? શરીરના કોઈ ભાગમાં દુખાવો ઉપડ્યો? બીજી કઈ માનસિક લાગણીઓ ઉભરી આવી? ધારો કે કોઈ માનસિક લાગણી ઉભરી નથી આવી. તો પણ જાતને જ સવાલ કરવાનો કે આ પદાર્થ સાથે સંકળાયેલી સૌથી શક્તિશાળી ભાવના કઈ છે? પછી જે જવાબ આવે તે અર્ધજાગૃત મનમાંથી આવશે, તેના પર વિશ્વાસ કરવાનો.

મહત્ત્વની વિગતો નોંધ્યા બાદ વધુ સૂક્ષ્મ વાતો યાદ કરી નોંધ કરવાની. શરૂઆતમાં જે ગોળ-ગોળ માહિતી બહાર આવતી હશે તે થોડા સમયમાં જ ‘ચોક્કસ’ બનતી જશે.

કોઈ વખત ઊર્જાની છાપ બહુ જલ્દી ઉપસી આવશે, કોઈ વાર ધીરે-ધીરે. થોડા સમયના પ્રયોગો પછી વધુ ને વધુ ફાવટ આવતી જશે.

15/20% સાચી માહિતી પણ મળે તો તે શુભ શરૂઆત કહેવાય. કદાચ કંઈ જ સાચી માહિતી ન મળે તો પણ નાસીપાસ થવાની જરૂર નથી. બની શકે કે થોડા જ પ્રયત્નો બાદ સફળતા મળે.

સાઈકોમેટ્રી પરથી શું શીખીશું?

દરેક વસ્તુની ઊર્જાની છાપ હંમેશ માટે સચવાઈ રહે છે તે ખ્યાલ આવ્યા પછી જે શીખવા મળે છે તે થોડા વર્ષો પહેલાં આપણી સંસ્કૃતિમાં જે રિવાજો હતા તેને યાદ કરાવે છે. સાથે-સાથે સાંપ્રત સમયમાં બધી જ રીતે લાગુ પડે છે.

1) બીજા કોઈની વસ્તુઓનો/વસ્ત્રોનો ઉપયોગ ટાળવો જોઈએ – મોબાઈલનો તો ખાસ. સૌથી વધુ ઊર્જાની છાપ અત્યારે તેના પર હોય છે.

2) શક્ય હોય તેટલા નાણાકીય વ્યવહાર રોકડને બદલે ઇલેક્ટ્રોનિક માધ્યમથી કરવા જોઈએ.

૩) જે સપાટી પર અનેક લોગોના હાથ અડતા હોય તે સપાટી પર હાથ ઓછો જાય તેવા પ્રયત્ન રહેવા જોઈએ. સ્પર્શ કરવો જ પડે તો હાથ તાત્કાલિક ધોવા જોઈએ.

4) આળસ આવતી હોય કે બીજા કોઈ કામની ઉતાવળ હોય તો પણ બહારથી ઘરે આવી કપડાં બદલી નાખવા જોઈએ. શક્ય હોય તો સ્નાન પણ કરી લેવું જોઈએ. બહારથી ખેંચી લાવેલી ઊર્જામાંથી મુક્ત થવા જરૂરી છે.

5) સારી ઊંઘ માટે નિદ્રાના થોડા સમય પહેલાં સ્નાન કરવું ફાયદાકારક રહેશે.

6) વ્યક્તિઓ સાથે સ્પર્શ ટાળવો જોઈએ.

7) ઘરમાં અનાવશ્યક વસ્તુઓનો ખડકલો ટાળવો જોઈએ, ખાસ કરીને સેકન્ડ હેન્ડ.

8)ભોજનમાં સ્વાદ કરતાં વધુ મહત્ત્વ ઊર્જાને, શરીરમાં ક્યા પ્રકારની લાગણી જન્મે છે તેનાં પર ધ્યાન દેવું જોઈએ.

9) ઊર્જા પ્રત્યે સભાનતા કેળવવી જોઈએ.

1૦) ઘરમાં કે ઓફિસમાં અસ્તવ્યસ્ત રાખેલી વસ્તુઓ ઊર્જા કાપે છે. વસ્તુઓ શક્ય તેટલી વ્યવસ્થિત રાખવાની અને ખુદ વ્યવસ્થિત રહેવાનો પ્રયત્ન કરવો જોઈએ.

11) સૌથી અગત્યની વાત: હિંસા, અદેખાઈ, હતાશા, ગુસ્સો વિગેરે લાગણીઓની ઊર્જા સેંકડો વર્ષ પછી પણ સચવાયેલી રહેતી હોય તો આવી ઊર્જા ઉભી કરી શરીરને એમાં ઝબોળવું જોઈએ કે પ્રેમની, વાત્સલ્યની, કરુણાની ઊર્જામાં તરબતોળ કરવું જોઈએ તે નિર્ણય જાતે જ લેવાનો રહ્યો. જે ઊર્જા સેંકડો વર્ષ પછી બીજાને પણ તકલીફ આપી શકતી હોય તે ઊર્જા શું પોતાને પુનર્જન્મમાં પણ તકલીફ ન આપી શકે? આ મુદ્દો પણ વિચાર માંગી લે છે.

12) સાઈકોમેટ્રી રોજબરોજની જિંદગીમાં પણ અત્યંત ઉપયોગી સાબિત થઈ શકે. ક્યા સ્થળ (રેસ્ટોરાં સહીત) પર જવું કે ન જવું, કઈ વસ્તુ ખરીદ કરવી કે ન કરવી, કોની સાથે સંપર્કમાં રહેવું અથવા કોનો સંપર્ક ટાળવો તે આ પરથી નક્કી થઈ શકે. વપરાયેલી વસ્તુ, જૅમ કે મોટરકાર, પોતાના બજેટને અનુલક્ષીને ખરીદવી જ પડી તો કઈ ખરીદવી, વધુ મોટી ખરીદી જેવી કે મકાનની ખરીદી વિગેરે તમામ જગ્યાએ ઉપયોગી થઈ શકે.

13) વ્યાવસાયિક સાઈકિકની સેવાઓ ઓન-લાઈન ઉપલબ્ધ હોય છે. ખર્ચાળ હોઈ શકે, પરંતુ કોઈ આપત્તિ સમયે પોતાના સંજોગો મુજબ આવી સેવાનો લાભ પણ લઈ શકાય.

પ્રસિદ્ધ જીવંત સાઈકિક

આ પહેલાંના લેખોમાં અમુક સાઈકિક તથા આ પ્રકારની શક્તિ ધરાવનાર સંતનો ઉલ્લેખ થઈ ચુક્યો છે. ચર્ચા પૂર્ણ કરતાં પહેલાં એક અત્યંત પ્રસિદ્ધ (હાલમાં જીવંત) સાઈકિક નોરિન રેનિયર વિષે પણ થોડું જાણીએ. સાઈકિક ડિટેક્ટિવ તરીકે તેની મદદથી પોલીસે લગભગ 600 જેટલા ગુના ઉકેલ્યા છે. વર્ષ 2005માં એક ખોવાયેલ વ્યક્તિના કિસ્સામાં તે વ્યક્તિના ટૂથ બ્રશ અને બુટ પરથી તેણે વ્યક્તિનું મૃત્યુ અને મૃત શરીર ક્યાં પડ્યું છે તેની ચોક્કસ જગ્યા બતાવેલી જ્યાંથી જ મૃતદેહ મળ્યો. વાળની લટ પરથી વ્યક્તિના ચહેરા, ભૂત-વર્તમાન વિષે સચોટ માહિતી અને ભવિષ્ય માટે આગાહી કરવા માટે તે પ્રખ્યાત છે.

આ સાથે સાઈકોમેટ્રીની ચર્ચા પૂર્ણ કરીએ છીએ. સાઈકોમેટ્રી માટે એક બીજો શબ્દ છે: ‘ક્લેયરટેન્જન્સી’ (Cleirtangency), તે જાણ માટે. લેખ 6, 7. 8 અને આ લેખમાં પણ દરેક જગ્યાએ ઉચ્ચાર અને યાદ રાખવામાં સરળ પડે માટે વૈકલ્પિક શબ્દ સાઈકોમેટ્રી વાપર્યો છે.

Categories: ભજન / પદ / ગીત / કાવ્ય / ગઝલ, રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૮) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

લેખમાળાના પહેલા તબક્કામાં  ઓરા, કુંડલિની, નાડી, ચક્રો વિષે વિગતે સમજ્યા. બીજા તબક્કામાં  ધ્યાનને લગતા વિવિધ પાસાંઓની વિસ્તૃત ચર્ચા કરી. ત્રીજા તબક્કામાં (લેખ 1 થી અત્યાર સુધી) અતીન્દ્રિય શક્તિઓની સમજણ લઈ રહ્યા છીએ. કલેયરવોયન્સ, કલેયરએમ્પથી, કલેયર ઓડિયન્સ બાદ લેખ 6 અને 7 માં સાઈકોમેટ્રી વિષે થોડું જાણ્યું. તેમાં આગળ વધીએ.

ભૂતકાળ, વર્તમાનકાળ, ભવિષ્યકાળ વિષે બધાને ખ્યાલ હતો. હવે કોરોનાકાળ ચાલી રહ્યો છે જે દરમ્યાન કોરોના કાળ બની ત્રાટક્યો છે. સરકાર અને મીડિયા દરેકને સ્પર્શનું મહત્ત્વ (અને પરિણામો) ઊંડાણપૂર્વક સમજાવી રહ્યા છે. સ્પર્શ દ્વારા વસ્તુમાં છુપાયેલી ઊર્જા શોધી કાઢવાની અતીન્દ્રિય શક્તિ સમજવા માટેનો શ્રેષ્ઠ સમય બીજો કયો હોઈ શકે? સ્પર્શ ચેપ પ્રવાહિત કરી શકે અને ઊર્જા પણ. કોઈ સંત માથા પર હાથ મૂકીને શક્તિપાત કરે તો કોઈ ધબ્બો મારીને. અલબત્ત, તે સિવાયની પણ શક્તિપાતની પદ્ધતિઓ છે જેના વિષે પછી કોઈ સમયે વાત.

દરેક વ્યક્તિમાં અતીન્દ્રિય શક્તિઓ છુપાયેલી તો હોય જ છે. તે જાગૃત થવાથી અને તેને વિકસાવવાનો નિર્ધાર કરવાથી રસ્તા મળી રહે છે. ત્યાર બાદ આવશ્યક છે કે તે રસ્તા પર ચાલવાનું શરૂ કરીએ, થાક્યા કે કંટાળ્યા વગર આગળ વધતા રહીએ. મંઝિલ એક ને એક દિવસે જરૂરથી આવશે. જો અશિક્ષિત અને અકિંચન શ્રમિકો આકરા તાપમાં અનેક વિઘ્નો વચ્ચે હજારથી પણ વધુ કિલોમીટર ચાલીને પોતાના ગંતવ્ય સ્થાન સુધી પહોંચી શકતા હોય તો તેનાથી વધુ પ્રેરણા કઈ હોઈ શકે?

વિવિધ અતીન્દ્રિય શક્તિઓ વિકસાવવાના રસ્તાઓ અંગે વિગતવાર કોઈ એક લેખમાં સમજીશું. આ શક્તિઓમાંથી સાઈકોમેટ્રી વિકસાવવાનું સૌથી સરળ છે, આનંદપ્રદ રીતે વિવિધ રમતો દ્વારા શીખી શકાય તેમ છે. કિટ્ટી પાર્ટીમાં પણ આ રમતો રમી શકાય. લેખ 9 માં એ વિષે ચર્ચા કરીશું. હાલમાં અન્ય આનુસંગિક પાસાં તપાસીએ જેથી વિષય વધુ સ્પષ્ટ થાય. હવે જયારે ઓનલાઈન સાઇકિક રીડર્સ પણ ઉપલબ્ધ હોય છે ત્યારે તેમની સેવાઓ ક્યા સંજોગોમાં મદદરૂપ થાય તે પણ જાણીએ.

સાઈકોમેટ્રી પ્રક્રિયા કઈ રીતની હોય?

સાઈકોમેટ્રીની સાથે બીજી કોઈ અતીન્દ્રિય શક્તિ આ પ્રકારના સાઇકીકમાં ચોક્કસ હોય. મોટાભાગે સાઇકોમેટ્રિસ્ટની ક્લેયરવોયન્સ શક્તિ વિકસિત હોય. જે વસ્તુ આપવામાં આવે તેના વિશેની વિગતો તેને સામાન્ય રીતે એક ચલચિત્રની માફક દેખાય. વસ્તુના વપરાશકર્તાઓની ઊર્જાની છાપ બધું જ કહી દે. એક કરતાં વધુ વ્યક્તિઓએ ઉપયોગ કર્યો હોય તો તે પણ ખ્યાલ આવી જાય. બીજી અતીન્દ્રિય શક્તિઓ ક્યા પ્રકારે વિકસી છે તે મુજબ માહિતી મળે – ક્લેયરઓડિઅન્ટ હોય તો અવાજ દ્વારા, કલેયરવોયન્ટ હોય તો દૃશ્યો દ્વારા, કલેયરએમપેથ હોય તો પોતે તે વ્યક્તિ વાપરનાર વ્યક્તિ જ હોય તેવી અનુભૂતિ દ્વારા.* .

કોઈ સમયમર્યાદા નથી. ગમે તેટલી જૂની વસ્તુ હોય, માલિકી બદલાતી રહી હોય છતાં બધાંની ઊર્જાની છાપ વસ્તુમાં સચવાયેલી પડી હોય. સાઇકિક જે તે વસ્તુના ભૂતકાળમાં મુસાફરી જ કરી લે. મુસાફરી સેંકડો, હજારો કે લાખો વર્ષ પહેલાંની દુનિયામાં હોઈ શકે. ઊર્જાની છાપ ઉકેલવી તે આ પ્રકારના સાઇકિક માટે કોઈ મોટું કામ નથી – બે દિવસ પહેલાંની છાપ હોય કે બે હજાર વર્ષ પહેલાંની.

આ વિષેનું એક ઉત્તમ ઉદાહરણ:

વાત 2002ની છે. એક સંત વેઈલ્સ (UK)ની મુલાકાત પર હતા. વેઈલ્સમાં આવેલું સેન્ટ ડેવિડ કેથેડ્રલ યુરોપનું પવિત્ર યાત્રાસ્થળ ગણાય છે, 1500 વર્ષ પહેલાં થઈ ગયેલા સેન્ટ ડેવિડનું સ્થળ છે, એ જ નામનું ગામ પણ ત્યાં વસેલું છે. આ સંતની રહેવાની વ્યવસ્થા જે જગ્યાએ થયેલી ત્યાંના અંગ્રેજ એસ્ટેટ મેનેજરના આગ્રહથી તેઓ (સંત) સેન્ટ ડેવિડ કેથેડ્રલ મુલાકાત દરમ્યાન એક ચેપલમાં પણ ગયા. તે ચેપલમાં કાચનાં બારણાંવાળા એક કબાટમાં કોઈ સંતના અસ્થિ રાખેલ હતાં. કબાટ પર એક બોર્ડ મારેલું હતું જેમાં ત્રણ અતિ પ્રાચીન સંતનાં નામ લખેલાં હતાં, વધુમાં લખેલું હતું કે તે અસ્થિ આ ત્રણમાંથી કોઈ એક સંતનાં છે. સદીઓ પહેલાંથી સચવાયેલાં એ અસ્થિ ખરેખર કોનાં હતાં તે સમયના વહેણ સાથે ભુલાઈ ગયેલું. આ સંતને પૂછવામાં આવ્યું કે શું તેમને ખ્યાલ આવી શકે કે આ અસ્થિ ત્રણ નામમાંથી ખરેખર ક્યા સંતનાં છે? તેમણે તરત જ 12મી સદીમાં થઈ ગયેલા એક સંતનું નામ આપ્યું (Saint Caradog) અને તે અંગેની સાબિતી પણ આપી. એ ઘટનાથી અત્યંત પ્રભાવિત થઈ તે અંગ્રેજ એસ્ટેટ મેનેજર ખાસ ભારત આવ્યા, સંતના આશ્રમમાં ઘણો સમય રહ્યા, તેમની સાથે પ્રશ્નોત્તરી દ્વારા આધ્યાત્મિક જિજ્ઞાસા સંતોષી જેના વિષે બાદમાં ‘The Flow of Consciousness’ નામનું પુસ્તક બહાર પડ્યું (https://www.amazon.in/Flow-Consciousness…/dp/B00M9CTGXE). તે સિવાય અમુક અકલ્પનીય ઘટનાઓ ત્યાં બની જેનો ઉલ્લેખ સ્થળ સંકોચના કારણે અહીં કર્યો નથી.

લાગણીઓ:

સાઈકોમેટ્રીનો પાયો ઊર્જા છે, ઊર્જાનો પાયો લાગણીઓ. વધુ તીવ્ર ભાવનાઓ હોય તે સપાટી પર પહેલાં આવે. ઉદાસી, અદેખાઈ, હિંસા, વેરઝેર, ગુસ્સો જેવી નકારાત્મક લાગણીઓની છાપ વધારે રહે. આ લાગણીઓની ઊર્જા સાઇકિકના ધ્યાનમાં પહેલાં આવે. ધારો કે એક ચપ્પુનો ઉપયોગ શાક સમારવામાં થતો હતો. ત્યાર બાદ તે જ ચપ્પુથી ખૂન પણ થયું. તો ખૂન થયું તેને લગતી વિગતો વધુ જલ્દી ધ્યાનમાં આવે. વસ્તુના અનેક ટુકડા કરી નાખીએ તો પણ ઊર્જા અકબંધ રહે; કારણ એ કે ઊર્જા તો અતિ સૂક્ષ્મ અણુઓ અને પરમાણુથી બનેલી હોય જેનો નાશ લગભગ અસંભવ રહે. આ અણુઓ અને પરમાણુઓ તો કરોડોની સંખ્યામાં હોય. દરેક પર લાગણીઓની પ્રિન્ટ છપાઈ ગઈ હોય.

વસ્તુની વાત સ્થળને એટલી જ લાગુ પડે. સ્થળ પર થયેલી ઘટનાઓ, ત્યાં વસેલા માણસોની લાગણીઓની ઊર્જા – બધું જ સાઇકિક વાંચી શકે. ભારતના નિકોબારની જેમ નેટિવ અમેરિકન લોકોની ઇરૉકવોઈસ (Iroquois) નામની એક જનજાતિ – ટ્રાઈબ છે. તે લોકોના વિસ્તારમાં જ્યોર્જ મેકમુલન (George McMullen) નામના એક સાઇકિકને લઈ જાય ત્યારે તે ત્યાંના લોકોએ ભૂતકાળમાં શું વાત કરી છે તે પણ સાંભળી શકતા અને તેનો અર્થ પણ સમજી શકતા.

પાદુકાની ઊર્જાનું વિશેષ મહત્ત્વ છે. પૂરા શરીરની ઊર્જા પગમાં નીચે ઊતરે, પાદુકામાં સૌથી વધુ હોય. શ્રી રામની પાદુકા સિંહાસન પર મૂકી ભરતજીએ રાજ્ય કર્યું. આજની તારીખે સંતોની પાદુકાનું વિશેષ મહત્વ છે. સંતોના પાદુકાપૂજન દ્વારા ગુરુપૂર્ણિમા જેવા કાર્યક્રમ પણ યોજાતા હોય છે. શા માટે? કારણ કે આ પાદુકા ઊર્જાવાન થઈ ગયેલી હોય. સામાન્ય માનવીની પાદુકામાં (ચંપલમાં) તેનાથી ઉલટું હોવાની સંભાવના છે. બધી નકારાત્મક લાગણીઓની/રોગની ઊર્જા ત્યાં સંગ્રહિત થઈ શકે. કોઈ બાયપાસ કરાવેલી વ્યક્તિનાં ચંપલ/બુટ ૨ દિવસ પહેર્યાં બાદ છાતીનો દુઃખાવો થઈ શકે. કોઈ જિજ્ઞાસુ વ્યક્તિ આ પ્રયોગ કરી શકે છે (પોતાના જોખમે) !!!

સાઇકોમેટ્રિસ્ટને શું જાણ થઈ શકે?

ધારો કે સાઈકિકને એક પત્ર આપ્યો. તે શું-શું જાણી શકે?

પત્ર લખનાર વ્યક્તિનો અવાજ, તેના શરીરનો બાંધો, શરીરમાં કોઈ ખોડ હોય તો તે, વ્યક્તિ ક્યા પ્રકારનાં કપડાં પહેરે છે/પહેરતી હતી, તેના વિચારો, તેની લાગણીઓ.

તે વ્યક્તિના ઘરની/ઑફિસની/ફેક્ટરીની આજુબાજુમાં શું છે

તે વ્યક્તિ જેના સંપર્કમાં આવતી હોય (કુટુંબીઓ, મિત્રો, સહકર્મીઓ) તેવા લોકો સાથે બનેલી ઘટનાઓ.

વ્યક્તિના પોતાના જીવનમાં બનેલી ઘટનાઓ.

સાઈકોમેટ્રીના શું ઉપયોગ થઈ શકે?

1) પુરાતત્ત્વને લગતાં સંશોધન માટે. કેનેડાના જ્યોર્જ મેકમૂલને (મૃત્યુ:2008) આ ક્ષેત્રમાં બહુ મદદ કરી છે. ઇજિપ્ત, કેનેડા, મિડલ ઈસ્ટ વિગેરેને લગતી અતિ પ્રાચીન, પ્રાગઐતિહાસિક યુગની માહિતી એકઠી કરવામાં પુરાતત્ત્વશાસ્ત્રીઓએ તેનો ઘણો ઉપયોગ કર્યો છે. ધારો કે કોઈ માટીના પ્રાચીન વાસણનો ટુકડો પુરાતત્ત્વને લગતી શોધખોળ દરમ્યાન મળ્યો. તો જ્યોર્જ તેના પરથી એ પ્રાચીન જમાનાને લગતી અનેક માહિતી આપી શકતા જે બાદમાં સાચી પણ સાબિત થતી.

પોલેન્ડમાં જન્મેલા એક અતિ પ્રસિદ્ધ સાઇકિક સ્ટીફન ઓસોવીસ્કીની શક્તિઓના અનેક કિસ્સા જગજાહેર છે. વોર્શો યુનિવર્સીટીમાં તેની શક્તિઓ ચકાસવા માટે અનેક પ્રયોગ થયેલા. દસ હજારથી પણ વધુ વર્ષ જુના ચક્મકના પથ્થરમાંથી બનેલું શસ્ત્ર તેને આપવામાં આવે તો તેના પરથી પણ પ્રાગઐતિહાસિક યુગના માનવીઓ વિષે બહુ જ વિગતવાર માહિતી આપી શકતા.

2) ખોવાયેલ વ્યક્તિ અથવા વસ્તુ શોધવા માટે.

ડચ સાઇકિક ગેરાર્ડ ક્રોઈઝેટ (Gerard Croiset) આ કાર્ય માટે વિશ્વવિખ્યાત હતા. 1980માં તેમનું અવસાન થયું તે પહેલાં અનેક દેશોના લોકોએ ખોવાયેલી વ્યક્તિ શોધવા માટે તેમની મદદ લીધેલી છે. એક અત્યંત પ્રસિદ્ધિ પામેલો કિસ્સો ડર્ક ઝવેન નામના બાળકનો છે. બહાર રમવા ગયેલો આ છોકરો અમુક સમય પછી પાછો ન આવ્યો ત્યારે પોલીસને જાણ કરવામાં આવી. બે દિવસ સુધી કોઈ ભાળ મળી નહિ. પોલીસ અધિકારીની સલાહથી બાળકના કાકાએ 115 માઈલ દૂરના શહેરમાં ગ્રેરાર્ડનો ફોન દ્વારા સંપર્ક કર્યો. ગ્રૅરાર્ડને દેખાયું કે એક નાના બંદર પરની એક નાની બોટ પર ડર્ક રમી રહ્યો છે, અચાનક લપસ્યો, પાણીમાં પડ્યો, માથું બોટ પર ટકરાયું, માથાની ડાબી તરફ ઇજા થઈ અને પાણીના વહેણમાં તે તણાયો. ગેરાર્ડે વધુમાં જણાવ્યું કે બાળકની લાશ થોડા દિવસમાં બીજા નાના બંદરમાં મળી આવશે જે પહેલા બંદર સાથે જોડાયેલ છે. કમનસીબે બીજા ત્રણ દિવસ પછી તે પ્રમાણે જ બન્યું, બાળકના માથાની ડાબી તરફ મોટું નિશાન પણ હતું.

3) અનેક લોકો પિતૃદોષ અંગેની વિધિ કરાવે છે. પિતૃની બાકી ઈચ્છા વિષે કોઈ આધારભૂત માહિતી હોતી નથી, ફક્ત કોઈના સૂચનના આધારે સામાન્ય રીતે આ વિધિ કરાવાતી હોય છે. સાઈકોમેટ્રી દ્વારા પોતાના કુટુંબના વડીલો (પિતૃઓ) વિષે ચોક્કસ માહિતી મેળવી તેમની બાકી ઇચ્છાઓ પૂરી કરી શકાય.

4) જીવનના હાલના અથવા ભૂતકાળના લોકો વિષે જાણી શકાય, કોઈ વસ્તુ વિષે જાણી શકાય, વિશ્વયુદ્ધ-2 ચાલુ થયું તે દરમ્યાન નાઝીઓએ પોલેન્ડ પર ચડાઈ કરી અને આશરે 20 લાખ લોકોને મારી નાખેલા. તે સમયે પોલિશ સાઈકિક સ્ટીફન ઓસોવીસ્કીએ પોતાની ક્ષમતા અનેક ખોવાયેલ લોકોને શોધી કાઢવામાં વાપરી. વ્યક્તિનો ફોટો હાથમાં લઈ તે કહેતા કે આ વ્યક્તિ જીવે છે કે મૃત છે અને જીવતી હોય તો ક્યાં છે. કોઈ પણ જાતનું વળતર સ્વીકાર્યા વગર તેમણે આ અમૂલ્ય માનવસેવા કરી. યુદ્ધ પૂરું થયું તે પહેલાં જ તેમનું પણ મૃત્યુ થયું જે આગાહી તેમણે પહેલાં જ કરી હતી.

5) ગૂમ થયેલી વ્યક્તિના વર્તમાન વિષે જાણી શકાય.

6)) ગુના ઉકેલી શકાય. વર્તમાનમાં પણ નેધરલેન્ડ, ઇંગ્લેન્ડ, અમેરિકા સહિત અનેક દેશોની પોલીસ સાઇકિક ડિટેક્ટિવની સેવા લે છે. જયારે ગુનાની કોઈ કડી મળતી ન હોય ત્યારે સાઇકિક ડિટેક્ટિવ પોતાની સાઈકોમેટ્રી અને અન્ય અતીન્દ્રિય શક્તિઓ કામે લગાડી પોલીસને મહત્ત્વની કડી આપે અને તે પછી ગુનો ઉકેલાઈ ગયો હોય તેવા અનેક કિસ્સા નોંધાયેલા છે.

ગ્રૅરાર્ડ ક્રોઈઝેટે નેધરલેન્ડ સિવાય પણ જર્મની, ઇંગ્લેન્ડ, અમેરિકા વિગેરે અનેક દેશોની પોલીસને વિવિધ ગુનાઓ ઉકેલવામાં મદદ કરી છે. મારી એક સાઇકિક મિત્ર બાર્બરા મેકી (

https://www.facebook.com/bmackey1

) હાલમાં પણ વિવિધ દેશોની પોલીસ માટે સાઇકિક ડિટેક્ટિવ તરીકે કાર્ય કરી રહી છે. https://www.barbaramackey.com/… પર વીડિઓ જોઈ શકો છો.

7) હાલના સંજોગોમાં પતિ-પત્ની પણ કોઈ શંકા જાય ત્યારે ડિટેક્ટિવની સેવાઓ લે છે. સાઇકોમેટ્રિસ્ટની સેવાઓ અહીં કામ આવી શકે.

8) કોઈ વ્યક્તિને નોકરીએ રાખતાં પહેલાં તેના વિષે વિસ્તૃત માહિતી મેળવી શકાય.

9) નોકરીએ રાખેલ વ્યક્તિને તો બદલી શકાય. પરંતુ બદલવી બહુ જ મુશ્કેલ પડે તેવી પસંદગી એટલે કે જીવનસાથીની પસંદગીમાં પણ સાઈકોમેટ્રી ઉપયોગી સાબિત થઈ શકે.

10) આ સિવાય પણ કોઈ પણ વ્યક્તિને લગતી મહત્ત્વની માહિતીઓ, તેની આદતો, વિચારધારા, ચારિત્ર્ય વિગેરે વિષે, ખુદ વિષે પણ (અનેક વસ્તુઓ ખુદની ખુદને ખબર હોતી નથી) જાણી શકાય.

11) ઘણી વખત અમુક અગત્યના દસ્તાવેજો ગુમ થઈ જાય છે. તેવા કિસ્સામાં પણ સાઈકોમેટ્રી મદદરૂપ થઈ શકે.

ખુદની આ શક્તિ કઈ રીતે વિકસાવી શકાય, સાઇકિક રીડરની સેવા લઈએ ત્યારે શ્રેષ્ઠ પરિણામ માટે શું ધ્યાન રાખવું જોઈએ, આ શક્તિઓનો સિદ્ધાંત દરેક મનુષ્યને શું શીખ (Learning Points) આપે છે તે આ પછીના લેખમાં સમજીશું. સાઈકોમેટ્રી વિષય તે લેખ સાથે પૂરો કરીશું.

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૭) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

લેખમાળાના ત્રીજા તબક્કામાં વિવિધ સાઈકિક પાવર્સ વિષે સમજણ મેળવી રહ્યા છીએ. કલેયરવોયન્સ, કલેયરએમ્પથી, કલેયરઓડિયન્સ બાદ છેલ્લા લેખમાં સાઈકોમેટ્રી વિષે વાત કરી રહ્યા હતા, તેને આગળ ધપાવીએ.

ન્યુરોસાયન્સ મુજબ મગજને જેટલું કષ્ટ આપીએ, કોઈ નવી ભાષા શીખીએ, કંઈ નવું જાણીએ તેટલું ફાયદાકારક છે, જ્ઞાનતંતુઓ મજબૂત થાય, મોટી ઉંમરે પણ મગજ સાબૂત રહે, અલ્ઝાઇમરની શક્યતાઓ ઘટી જાય. તો ચાલો, મગજને થોડું કસીએ.

નીચેના પ્રશ્નો વિષે વિચારી ગંભીરતાપૂર્વક માનસિક રીતે જવાબ તૈયાર કરીએ.

૧) એક વ્યક્તિ વધુમાં વધુ કેટલી ભાષા જાણતી હોઈ શકે? જાણવાનો મતલબ ઓછામાં ઓછી એટલી જાણકારી કે પોતાની માતૃભાષાના પુસ્તકનું બીજી ભાષામાં સરળતાથી અને ઝડપથી ભાષાંતર કરી શકે.

૨) બીજી ભાષા શીખવા માટે આશરે કેટલો સમય લાગે?

૩) કોઈ વ્યક્તિ વધુમાં વધુ કેટલા પૌરાણિક ગ્રંથોનું જ્ઞાન ધરાવી શકે? એ રીતે આત્મસાત થઈ શકે કે તે ગ્રંથોનો કોઈ પણ સંદર્ભ ક્યા પાનાં પર છે તે પણ કહી શકે? તે સંદર્ભ વિષે ગ્રંથ પર નજર પણ કર્યા વગર કલાકો સુધી પ્રવચન આપી શકે?

૪) વ્યક્તિ જે ગ્રંથોનું જ્ઞાન ઉપરોક્ત રીતે ધરાવે તે ગ્રંથો તેણે વાંચ્યા જ ન હોય કે સાંભળ્યા જ ન હોય તે સંભવ છે?

૫) મુન્નાભાઈ 𝐌𝐁𝐁𝐒 ફિલ્મમાં મેડિકલ કોલેજના ડીન ડો. આસ્થાનાને બંને હાથથી એક સાથે બોર્ડ પર લખતા જોયા છે. પરંતુ બંને હાથથી એક સાથે લખતાં-લખતાં જુદા-જુદા પ્રશ્નોના જવાબ પ્રરીક્ષામાં આપી શકાય?

સ્પીડ બ્રેકર: આગળ વાંચતાં પહેલાં ઉપરોક્ત પ્રશ્નોના માનસિક જવાબ તૈયાર કરીએ.

ગિનિસ બુક ઓફ વર્લ્ડ રેકોર્ડ્સમાં વિશ્વમાં સૌથી વધુ ભાષા જાણવાનો રેકોર્ડ લાઈબીરિયાના ઝલાડ યુસુફ ફૈઝ નામની વ્યક્તિને નામે છે. ૫૯ ભાષા તે જાણે છે. બની શકે કે કોઈ વિભૂતિ એવી પણ હોય કે જેનો ઉલ્લેખ ગિનિસ બુકમાં ન હોય, પરંતુ તેની ઉપલબ્ધિ વધુ હોય. એવી જ વાત હવે કરવાની છે. જેનો ઉલ્લેખ હવે થવાનો છે તેમની થોડી ઉપલબ્ધિઓ પર નજર નાખીએ. ઉપરોક્ત પ્રશ્નોના જવાબ તેમાં જ સમાયેલ છે.

૧) શ્રીમદ રાજચંદ્રજી રચિત ‘આત્મસિદ્ધિ શાસ્ત્ર’ નામક પુસ્તકનું ભાષાંતર આ વિભૂતિએ સરળતાથી, કોઈ પણ ડીક્ષનેરી કે વ્યક્તિની સહાય વગર ૧૪૨ ભાષામાં કર્યું છે. આશરે ૩ વર્ષના સમયગાળામાં તેમણે ૧૪૨ દેશોનો પ્રવાસ અને આ ભાષાંતર કર્યાં છે.

૨) બીજી ભાષા શીખવા માટે તેમણે કોઈ પ્રયાસ કર્યો નથી, સિવાય કે જે તે દેશનો પ્રવાસ. જે મિનિટે તેમણે બીજા દેશની ભૂમિ પર પગ મૂક્યો, ફ્લાઈટમાંથી નીચે ઊતર્યા એટલે એ ભાષા તેમને બોલતાં-લખતાં આવડી ગઈ છે, એ ભાષામાં ઉપરોક્ત પુસ્તકને ભાષાંતરિત કરી એ દેશ છોડ્યો છે. અનેક ભાષાઓ એવી છે કે જે તેમણે કદી સાંભળી પણ ન હતી. વિવિધ દેશોમાં તેમણે તે દેશની ભાષામાં પ્રવચન પણ આપ્યાં છે. આ થયું સ્થળ (𝐏𝐥𝐚𝐜𝐞) સાઈકોમેટ્રીનું એક જીવંત ઉદાહરણ.

૩) તેઓ ૧૫૦૦ પ્રાચીન ગ્રંથોનું સંપૂર્ણ જ્ઞાન ધરાવે છે. સેંકડો વર્ષ પહેલાં પ્રબુદ્ધ સંતો દ્વારા લખાયેલ આ ગ્રંથોમાંથી કોઈ પણ સંદર્ભ પર પાનાં નંબર સાથે બધું જ યાદ હોય અને તેના પર પ્રવચન આપ્યાં હોય તેવો તેમનો કિસ્સો છે.

૪) ઉપરોક્ત ગ્રંથો તેમણે કદી વાંચ્યા નથી. પૂર્વજન્મની સ્મૃતિના આધારે આ ગ્રંથોનું જ્ઞાન કુદરતી રીતે જ તેમને આત્મસાત થયું છે.

૫) વિદ્યાર્થી અવસ્થામાં પરીક્ષા આપતી વખતે બંને હાથનો ઉપયોગ કરી જુદા-જુદા પ્રશ્નોના જવાબ તેમણે અલગ-અલગ કાગળ પર એક સાથે આપ્યા છે.

૬) આજ સુધીમાં ૩૦૦૦૦ પ્રવચન આપ્યાં છે જેમાંથી ૧૦, સાઈટ પર ડાઉનલોડ કરવા માટે ઉપલબ્ધ છે

એક જ વ્યક્તિ અને આટલી બધી ઉપલબ્ધી! કેટલું આશ્ચર્યજનક છે ! અધધધ થઈ જવાય તેવા પ્રકારની કલ્પનાતીત ઉપલબ્ધિ ધરાવનાર એક જ માનવદેહમાં વ્યક્તિની ઉંમર કેટલી હોઈ શકે? જવાબ છે: ફક્ત ૪૦ વર્ષ. કોણ હશે આ? આગળ જાણીશું.

ઘણી વખત એવું બને કે નજીકમાં જ કોઈ આવી વિશિષ્ટ વ્યક્તિ/સંત/મહાત્મા હોય અને આપણને ખ્યાલ જ ન હોય. અથવા કોઈ પાસેથી વાત સાંભળી હોય તો પણ આ વિષયની માહિતીના અભાવે અને શંકા-કુશંકાને કારણે તે વાતમાં રસ લીધો ન હોય.

આ વિશિષ્ટ વિભૂતિ કોણ છે, ક્યાં છે તે વિષે જાણીને વધુ આશ્ચર્ય અને આનંદ થશે. જો તેમના વિષે ખ્યાલ નહિ હોય તો નવાઈ પણ લાગશે કે આવી સિદ્ધિ ધરાવનાર વિભૂતિ ગુજરાતમાં જ હોવા છતાં તેમના વિષે ખબર કેમ નથી. તેઓ છે: શ્રી ફુલચંદ શાસ્ત્રીજી. ભાવનગર જિલ્લાના ઉમરાળા ગામમાં જ તેમનો જન્મ અને નિવાસ છે. વિશેષ માહિતી 𝐡𝐭𝐭𝐩𝐬://𝐰𝐰𝐰.𝐟𝐮𝐥𝐜𝐡𝐚𝐧𝐝𝐬𝐡𝐚𝐬𝐭𝐫𝐢.𝐜𝐨𝐦/ પરથી મેળવી શકાશે. તેમનો એક ઇન્ટરવ્યૂ આ લિંક પર છે. 𝐡𝐭𝐭𝐩𝐬://𝐰𝐰𝐰.𝐲𝐨𝐮𝐭𝐮𝐛𝐞.𝐜𝐨𝐦/𝐰𝐚𝐭𝐜𝐡?𝐯=𝐓𝐈𝐎- 𝐊𝟎𝐜𝐎𝐌𝐣𝐨

લેખની શરૂઆતના પ્રશ્નોના જે જવાબ ધારેલા હોય અને ઉપરની હકીકતમાં ફર્ક હોય તો એક વસ્તુ શીખવાની રહે. દરેક નવી માહિતી માટે દિલ અને દિમાગ ખુલ્લાં રાખવાં જોઈએ – કોઈ દિવસ ન સાંભળી હોય, તર્કસંગત ન લગતી હોય તેવી માહિતી હોય તો પણ. નવી માહિતી દર વખતે સાચી જ હોય તેવું જરૂરી નથી પરંતુ જીંદગીભરમાં જે જાણ્યું છે, તે વિશ્વના અગાધ જ્ઞાનસાગરનું ટીપું માત્ર છે તે ખ્યાલ વિકાસ પામશે તો ઘણું નવું જાણી શકીશું, શીખી શકીશું; બેધ્યાનપણે જો અભિમાન-ઈગો ઘર કરી ગયો હશે તો તે થોડો નબળો પડી શકશે, ચક્રોની/ નાડીઓની સ્થિતિ સુધરશે, ‘મને જ આવડે, મને જ આવડે; તે જ અજ્ઞાનતા’ તેવું આત્મદર્શન સંભવ બનશે.

સાઈકોમેટ્રી સંદર્ભમાં એક વાચક તરફથી અમુક જીજ્ઞાશા વ્યક્ત થઈ છે. તમામ મુદ્દા સુસંગત અને મહત્ત્વના છે જેની ચર્ચા થકી વિષય વધારે સ્પષ્ટ થઈ શકશે. તે વિગતવાર જોઈએ.

૧) ઘણી વાતો અનુભવાતી હોવા છતાં તેનું આધ્યાત્મિક કારણ ખબર હોતી નથી. કદાચ એટલે જ ‘ધરતીનો છેડો ઘર’ કે ‘ 𝐡𝐨𝐦𝐞 𝐬𝐰𝐞𝐞𝐭 𝐡𝐨𝐦��’ કહેવાતું હશે.

જ્યાં સુધી ઘરમાં શાંતિ હોય ત્યાં સુધી આ હકીકત એકદમ સાચી છે. ઘરની ઊર્જાનો એક લિટ્મસ ટેસ્ટ છે. દંપતી ઘરમાં તથા ઘર બહાર – બંને જગ્યાએ – શાંતિથી રહી શકે તો ઘરની ઊર્જા સારી છે. કોઈ કિસ્સામાં એવું જોવા મળે છે કે દંપતી ઘરની બહાર એકદમ આનંદથી રહી શકે, ફરવા જાય ત્યાં પણ આનંદ કરી શકે, પરંતુ ઘરમાં આવ્યા બાદ અકળામણ થાય. આ સંજોગો ખાસ કરીને ત્યારે ઊભા થાય જયારે પતિ-પત્ની વચ્ચે અવારનવાર ઝઘડા થતા હોય. રોજ કંકાસને કારણે ઘરની ઊર્જા સારી રહી ન હોય. જેવા ઘર બહાર નીકળે એટલે આંતરિક વિરોધ શમી જાય. પ્રાચીન કાળમાં કોપભવનનો ખ્યાલ હતો તે આ સિદ્ધાંતના આધારે જ ઉદ્ભવ્યો હશે જેથી દુષિત ઊર્જા એક જ જગ્યા પર રહે, ઘરમાં અન્ય જગ્યાએ તકલીફ ન કરે. ખાસ કરીને બેડરૂમ અને રસોડું એવી જગ્યા છે કે જ્યાં કોઈ પણ સંજોગોમાં કલહ ન થવો જોઈએ.

૨) વાસ્તુશાસ્ત્ર પ્રમાણેની વિધિને આ વાત સાથે સંબંધ ખરો?

દરેક સ્થળ અને વસ્તુમાં તેનો ઉપયોગ જેના દ્વારા થયેલ હોય તે વ્યક્તિઓની, ત્યાં જે પ્રસંગ બનેલા હોય તેની ઊર્જા હોય. જેમ કે કોઈ જગ્યા પર અપમૃત્યુ થયેલ વ્યક્તિની ઊર્જા હોય, ત્યાં રહી ચૂકેલ વ્યક્તિના સ્વભાવની ઊર્જા હોય, તેના રોગની ઊર્જા હોય. આ ઊર્જા નવી રહેવા આવનાર વ્યક્તિને અસર પહોંચાડી શકે. વ્યક્તિ જેટલી વધુ સંવેદનશીલ તેટલી વધુ અસર. એક ઘટના પરથી સમજી શકાશે. મારા એક અતિ સંવેદનશીલ મિત્ર અને હું એક બીજા મિત્રના ઘરે ગયા. જેના ઘરે ગયા તે મિત્ર બહુ વખતથી ડિપ્રેસનમાં હતા જેને કારણે ઘરનું વાતાવરણ પણ અત્યંત ઉદાસીન હતું, બધા ચિંતિત હતા. આશરે ૨ કલાક પછી અમે ત્યાંથી વિદાય લીધી. તે પછી થોડી જ વારમાં મારા સંવેદનશીલ મિત્રની જીભ પર ચાંદાં પડી ગયાં, જે ૧/૨ દિવસ પછી જતાં રહ્યાં. જેના ઘરે ગયા હતા તે મિત્રના પુત્રનો બીજા દિવસે ફોન આવ્યો કે તમે લોકો ગયા પછી ઘરનું વાતાવરણ એકદમ ફરી ગયું, એનર્જી ફરી ગઈ, જાદુઈ લાકડીની જેમ બધા ખુશખુશાલ થઈ ગયા. મતલબ એ થયો કે તકલીફવાળી ઊર્જા ઘરમાંથી સંવેદનશીલ મિત્ર તરફ પ્રવાહિત થઈ. ત્યાર બાદ તો ૧૫ વર્ષથી એ ઘરમાં ધ્યાનકેન્દ્ર ચાલે છે તેથી ત્યાંની ઊર્જા સદંતર ફરી ગઈ છે.

આ પ્રકારની ઊર્જા કોઈ સ્થળમાં હોય તો તેને દૂર કરવા માટે વાસ્તુશાસ્ત્રની વિધિનું પ્રાવધાન છે.

૩) કેટલીક વસ્તુઓ જૂની/બિન-ઉપયોગી થઈ જાય તો પણ તેનો નિકાલ કરવાની ઇચ્છા થતી નથી. તેમની સંચિત ઊર્જા આ માટે કારણભૂત હશે?

જી, હા. ચોક્કસ સંચિત ઊર્જાનું જ પરિણામ. લેખ 6 માં દર્શાવેલું કે જાણતાં-અજાણતાં બીજા કોઈના ઘરે/ઓફિસે પણ કોઈ એક ખાસ સોફા કે ખુરશી પર દરેક વખતે બેસી જઈએ છીએ. કારણ એ જ છે કે અગાઉની મુલાકાત દરમ્યાન ત્યાં બેઠાં ત્યારથી આપણી ઊર્જા તે જગ્યાએ સચવાયેલી પડી હોય. ઊર્જા સ્પર્શથી પ્રવાહિત થઈ હોય, લાગણીઓથી થઈ હોય (𝐄𝐦𝐨𝐭𝐢𝐨𝐧𝐚𝐥 𝐀𝐭𝐭𝐚𝐜𝐡𝐦𝐞𝐧𝐭), વિચારથી થઈ હોય (જરૂર પડશે તો ક્યા લેવા જાશું પાછા?) અન્ય રીતે થઈ હોય. તે ઊર્જા જે-તે વસ્તુનો નિકાલ કરતા વ્યક્તિને રોકે. એક વાર નિકાલ કરી શકે તો નવી ઊર્જાની જગ્યા ઊભી થાય જે માનસિક હળવાશના રૂપમાં વ્યક્તિને મહેસૂસ થાય.

૪) અમુક પૌરાણિક/ધાર્મિક સ્થળોમાં શાંતિ મળતી હોય છે, એનું કારણ પણ એ જ હોઈ શકે?

ચોક્કસ એ જ કારણ હોય. ડો. મસારુ ઈમોટોના પાણી પરના પ્રયોગો  પરથી વૈજ્ઞાનિક રીતે સાબિત થઈ ચૂકેલું છે કે દરેક સ્થળની ઊર્જા જુદી હોય. આશ્રમની જુદી હોય અને કોર્ટ કે યુદ્ધભૂમિની જુદી હોય. કોર્ટ કે હોસ્પિટલમાં જતાં જ જુદી અનુભૂતિ થાય, ડિસ્કો ક્લબમાં જુદી ફીલ આવે. ઘરમાં પણ ધ્યાનખંડમાં શાંતિ વધુ મળે. વિવિધ શહેર અને દેશની ઊર્જા પણ અલગ-અલગ હોય. લેખ 6 માં ઉલ્લેખ કરેલો કે લદ્દાખમાં દેશભક્તિની ઊર્જા એટલી હદે મેહસૂસ થાય કે દેશભક્તિની ભાવનાને તાત્કાલિક બૂસ્ટર ડોઝ મળે. આધ્યાત્મિક ઊર્જા પણ તેટલી જ મેહસૂસ થાય. માઉન્ટ કૈલાશની ઊર્જા વિષે તો બધા જાણે જ છે! આથી વિરુદ્ધ, મુંબઈમાં ગીચ વસ્તીને કારણે વૈચારિક પ્રદુષણ હોય. તેથી ત્યાં અકળામણ અનુભવાય. કોઈ ઉતાવળ ન હોય તેવો ત્યાં ફરવા ગયેલો માણસ પણ સ્થાનિક વ્યક્તિની જેમ ઝડપથી ચાલવા લાગે કારણ કે સામુહિક વિચારોની ઊર્જા તેને પ્રભાવિત કરે. (પ્રશ્ન 𝟓માં વિશેષ વાત).

૫) કોઈ જગ્યા એક વ્યક્તિને માફક આવતી નથી, જયારે કેટલાકને એ જ જગ્યા ફળદાયી નીવડે છે. તો શું એક જગ્યા એકને માટે ઊર્જાવાન અને બીજાને માટે નકારાત્મક બની શકે?

દરેક સ્થળની એક મૂળભૂત ઊર્જા હોય જેમાં તમામ બાંધકામનો સામાન, બાંધકામ કરનાર વ્યક્તિઓની ઊર્જા, વાસ્તુશાસ્ત્રના નિયમો વિગેરેનું મિશ્રણ હોય. પુનઃવેચાણ (𝐑𝐞𝐬𝐚𝐥𝐞) સમયે મકાનમાં પહેલાં રહેલ વ્યક્તિઓની અને ત્યાં થયેલ પ્રવૃત્તિઓની ઊર્જા પણ હોય. વેચનાર વ્યક્તિ કઈ ભાવનાથી, ક્યા સંજોગોમાં વેચે છે તે ભાગ ભજવે. મજબૂરીને કારણે મકાન વેચવું પડ્યું હોય તો દુઃખની લાગણી પણ હોય. લેણદારને સોંપવું પડ્યું હોય તો ગુસ્સો/નફરત હોઈ શકે. જયારે સરકારે નવો કાયદો ઘડ્યો કે દેવાદાર પાસેથી ગીરો મિલ્કતનો કબ્જો બેન્ક લઈ શકે ત્યારે જામનગરમાં તેવા સંજોગો ઉપસ્થિત થયેલા. તે દેવાદાર એટલો ગુસ્સે હતો કે મકાન ખાલી કરતાં પહેલાં તેણે ઇલેક્ટ્રિક સ્વિચ બોર્ડ પણ તોડી નાખેલાં, બીજી ઘણી તોડફોડ કરેલી. આમ એક થઈ સ્થળની મૂળભૂત ઊર્જા.

ત્યાર બાદ વાત આવી જે વ્યક્તિ ખરીદે છે, રહેવા આવે છે તેના પર. તે ક્યા પ્રકારના રંગો ઘરમાં વાપરે છે, ફર્નિચરની ગોઠવણી ક્યા પ્રકારે કરે છે, ક્યા પ્રકારનું સંગીત વગાડે છે, ઘરમાં ઇલેક્ટ્રોનિક ગેઝેટ્સ કેટલાં છે, તેનો વપરાશ કેટલો છે, ઊર્જા સંદર્ભે વ્યક્તિની સંવેદનશીલતા કેટલી છે, ઘરમાં કેવું વાતાવરણ છે, ક્યા પ્રકારની પ્રવૃત્તિ થાય છે (જેમ કે કોઈ ફોજદારી વકીલ ઘરમાંથી ઓફિસનું કામ કરતાં હોય, કોઈ નિયમિત ધ્યાન કરતું હોય, કોઈ નેતાના ઘરમાં રાજકીય કાવાદાવા ઘડાતા હોય), રહેનાર વ્યક્તિઓના વિચારો કેવા છે, ઘરમાં નકામી વસ્તુઓ ભરી છે કે નહિ, અરીસાઓની ગોઠવણ કેમ છે વિગેરે અનેક પરિબળોની અસર રહે.

હવે અસર થાય નવા આવનાર વ્યક્તિનાં ચક્રોની સ્થિતિ મુજબ. વ્યક્તિની માફક દરેક સ્થળનાં, પ્રદેશનાં અને પૃથ્વીનાં પણ ચક્ર હોય. મકાનનાં પણ ચક્ર હોય. ધારો કે મકાનનું હૃદય ચક્ર દુષિત છે, રહેવા આવનાર વ્યક્તિનું પણ હૃદયચક્ર નબળું છે, તો તેને માટે જોખમ થઈ શકે. જો એ વ્યક્તિનું હૃદયચક્ર બરાબર હોય અને બીજું કોઈ ચક્ર કદાચ નબળું હોય, તો તેને વાંધો આવે નહિ. એક ઉદાહરણથી સમજીએ. મારા એક મિત્રને યુવાનવયે છાતીનો દુખાવો રહેવા લાગ્યો. આશરે એક મહિના સુધી દર્દ સહન કર્યા બાદ તે ચેક-અપ માટે ગયો. ડોક્ટરને કાર્ડિયોગ્રામમાં ઓછી તીવ્રતાનો હાર્ટ એટેક દેખાયો. દવાઓ લખી આપી. તે મિત્રે દવાઓ લીધી નહિ. તે ‘સમર્પણ ધ્યાન’ નામક ધ્યાન પદ્ધતિ સાથે જોડાયેલો હતો અચાનક તેના પર તે ધ્યાન પદ્ધતિના પ્રણેતા શ્રી શિવકૃપાનંદ સ્વામીજીનો ફોન આવ્યો (સ્વામીજી આશરે ૫૦૦ કિલો મીટર દૂર બીજા શહેરમાં હતા) અને કહ્યું: “તારા મકાનનું હૃદયચક્ર દૂષિત છે, પરિણામે હાલમાં તારું હૃદયચક્ર પણ નબળું પડ્યું છે, તને તકલીફ થઈ શકે, તાત્કાલિક તે મકાન ખાલી કર.” (આ થયો કલેયરવોયન્સ અને સાઈકોમેટ્રીનો સંયુક્ત પ્રભાવ.) ત્રણ દિવસમાં મારો મિત્ર બીજે રહેવા જતો રહ્યો, કોઈ દવા વગર જ સ્વસ્થ થઈ ગયો. એ વાતને આજે ૧૮ વર્ષ વીતી ગયા છે. આ કિસ્સામાં એમ બની શકે કે કોઈ અત્યંત મજબૂત હૃદયચક્રવાળી વ્યક્તિ ત્યાં રહેવા આવે તો તેને કોઈ તકલીફ ન થાય. અહીં એક અત્યંત રસપ્રદ વાત એ છે કે મારા તે મિત્રના પાડોશમાં રહેતા એક નિષ્ણાત જ્યોતિષીએ તેને પહેલાં જ કહેલું કે તેની કુંડળીના ગ્રહોની સ્થિતિ મુજબ આ મકાન તેને તકલીફ ઊભી કરી શકે.

આ પ્રમાણે એક વ્યક્તિને એક જગ્યા માફક ન આવે અને બીજાને આવે તે પાછળ અનેક પરિબળો કારણભૂત હોઈ શકે.

સાઈકોમેટ્રી અંગેના વિશેષ મહત્ત્વના મુદ્દા લેખ 8 માં ચર્ચીશું. આજે અહીં વિરામ લઈએ.

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૬) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

‘કોવિડ-19’ શબ્દ હાલમાં વિશ્વભરના તમામ શબ્દકોશમાં ઉમેરાયો. આ સાથે જ વ્યક્તિમાત્ર જેનાથી અતિ પરિચિત છે તેવી એક ભાષા લુપ્ત થવાના આરે પહોંચી ગઈ. આ છે ‘સ્પર્શની ભાષા’. શબ્દો ખૂટી પડે તો પણ આ ભાષા કામ કરે. પ્રેમનો સ્પર્શ, વહાલનો સ્પર્શ, સાંત્વનનો સ્પર્શ, મિલનના આનંદનો સ્પર્શ, ગુસ્સાથી ગાલ પર થયેલો ગાલને લાલ કરી દે તેવો સ્પર્શ (!) – કેટકેટલું કહી શકે ફક્ત સ્પર્શની ભાષા ! અંતરથી નજીક કોઈ વ્યક્તિએ સ્પર્શ કરેલ વસ્તુનો સ્પર્શ પણ અનેક સંવેદનાઓ જગાવી શકે. કોઈ ચાહિતી વ્યક્તિના મૃત્યુ બાદ એનું ઓશીકું પ્યારું લાગી શકે, તેની સાથે વાતો થઈ શકે, તેની પર મોઢું છુપાવીને રડી પણ શકાય. કવિતાઓમાં અને શાયરીઓમાં પણ સ્પર્શ વિષે કેટલું બધું કહેવાયું છે!

તારો જ સ્પર્શ એમાં અકબંધ છે હજુ પણ,

મારે એ બંધ ઘરની સાંકળ સુધી જવું છે.

– કાયમ હઝારી,

ચીનના આભારી છીએ (!) જેણે દુનિયાભરને સાંપ્રત સમયમાં સ્પર્શનું મહત્ત્વ અતિ પ્રભાવક રીતે સમજાવ્યું. બરાબર ખ્યાલ આવી ગયો કે સ્પર્શનો અભાવ કેટલી અકળામણ, અસુવિધા અને આપત્તિ ઉભી કરી શકે.

સ્પર્શની ભાષા કેમ છે? કારણ કે દરેક સ્પર્શમાં સંવેદના છે, સ્પંદન છે. સંવેદના-સ્પંદન કેમ છે? કારણ કે દરેક સ્પર્શમાં વિશિષ્ટ ઊર્જા છે? આમીરખાન અભિનિત ‘PK’ જોયું હશે. શું હતું તેમાં? યાદ કરીએ. આમીરખાન પરગ્રહવાસી છે, અમુક કારણોસર પૃથ્વી પર આવી જાય છે, પાછો જઈ શકતો નથી. તેનામાં એવી શક્તિ છે કે જેને સ્પર્શ કરે તેના વિષે બધી માહિતી મેળવી લે. એક સ્ત્રીનો હાથ પકડી ભોજપુરી ભાષા પણ શીખી લે છે.

આવી શક્તિ ધરાવવા માટે એલિયન હોવું જરૂરી છે? શું આ કપોળ કલ્પના માત્ર છે? જી, ના ! પૃથ્વીના પટ પર આ પ્રકારની અતીન્દ્રિય શક્તિ ધરાવનાર વિશિષ્ટ લોકોનું અસ્તિત્વ છે, સાઇકોમેટ્રી (Psychometry) નામક અતીન્દ્રિય શક્તિ.-સાઈકિક પાવર છે આ.

ક્રેગ હેમિલ્ટન પારકર નામના એક સાઈકિક ઇંગ્લેન્ડમાં છે જેમની અતીન્દ્રિય શક્તિઓ જગજાહેર છે. ક્રેગનાં પત્ની જેન પણ વિશ્વપ્રસિદ્ધ સાઈકિક છે. BBC પર ‘Inside Out’ નામનો એક પ્રોગ્રામ આવે છે. તે કાર્યક્રમમાં ક્રેગને બોલાવવામાં આવ્યા. કાર્યક્રમનો સંચાલક ચાર્લ્સ ક્રેગને આંખ પર પાટા બાંધીને એક દૂરની જગ્યાએ લઈ ગયો. 100 વર્ષથી પણ વધુ જૂની એક ઇમારતમાં ક્રેગને લઇ ગયા બાદ તેની આંખના પાટા ખોલી હાથમાં એક પ્રાચીન વાયોલિન આપવામાં આવ્યું. તે વાયોલિનના સ્પર્શ સાથે ક્રેગે કહેવાનું શરુ કર્યું કે ક્યા પ્રકારની વ્યક્તિએ આ વાયોલિન વગાડ્યું હશે, તે વ્યક્તિ મુખ્યત્વે સંગીતકાર નહિ પરંતુ સાહિત્યકાર હશે વિગેરે. અંતમાં તેણે એ પણ કહ્યું કે ત્રણ નામ તેનાં મગજમાં આવી રહ્યા છે. ત્રણે નામ વિક્ટોરિયન યુગના અતિ પ્રખ્યાત સાહિત્યકારોનાં હતા. તેમાંથી એક નામ હતું ‘થોમસ હાર્ડી’. ખરેખર વાયોલિન તેમનું જ હતું. આ કાર્યક્રમની એક નાની કલીપ https://youtu.be/eZyv729ZETE પર જોઈ શકશો.

જરા વધારે વ્યવસ્થિત રીતે સાઈકોમેટ્રીવિષે સમજીએ.

સાઈકોમેટ્રી એટલે શું?

એટલે એવી અતીન્દ્રિય શક્તિ કે કોઈ પણ વસ્તુને સ્પર્શ કરતાં જ જાણી શકાય તેનો ઇતિહાસ શું છે, ક્યા પ્રકારની વ્યક્તિઓ દ્વારા એનો ઉપયોગ થયો છે વિગેરે. સામાન્ય રીતે તો ભૂતકાળ વિષે ખ્યાલ આવે પણ વધુ શક્તિશાળી સાઈકિકને તે વસ્તુના વર્તમાન વિષે પણ જાણ થઈ જાય. તે વસ્તુ જેણે વાપરી હોય તે વ્યક્તિનાં વ્યક્તિત્વ વિષે ખ્યાલ આવી જાય, તેનો માલિક કોણ હતો, તે વસ્તુનો ઉપયોગ શા માટે થયો હતો, એ વસ્તુ જેની પાસે હતી તેને શું થયું હશે (જેમ કે તેને અકસ્માત થયો હોય) તે ખ્યાલ પણ આવી જાય. આ પ્રકારની શક્તિ ધરાવનારને કહેવાય છે સાઇકોમેટ્રિસ્ટ (Psychometrist).

જે વસ્તુને સ્પર્શ કરીએ તેના પર ફિંગર પ્રિન્ટ હોય છે જે સામાન્ય વ્યક્તિને ન દેખાતી હોય છતાં ફોરેન્સિક સાયન્સ તે શોધી કાઢે. આ વાત તો સર્વવિદિત છે? બસ, આ જ રીતે દરેક વસ્તુ પર સ્પર્શ કરનાર વ્યક્તિની ઊર્જાની છાપ હોય. આ છાપ પરથી તે વ્યક્તિ વિષે બધી જ માહિતી દસકાઓ કે સેંકડો વર્ષ પછી પણ મળી જાય – જો સાઈકોમેટ્રી વિકસિત હોય તો. જે વસ્તુ કોઈ વ્યક્તિ દ્વારા વધારે સમય વપરાયેલી હોય તેમાં આ એનર્જી પ્રિન્ટ વધુ હોય. ચશ્માં, વધુ સમય અથવા કાયમ પહેરેલા દાગીના વિગેરે પર આ પ્રિન્ટ વધુ હોય, ધાતુ પર આવી પ્રિન્ટ વધુ હોય. આજના સમયમાં સૌથી વધુ પ્રિન્ટ સેલ ફોન પર મળે.

દરેક વ્યક્તિ થોડે-ઘણે અંશે સાઈકિક હોય છે, એનર્જી જાણતાં-અજાણતાં મેહસૂસ પણ કરે છે. થોડા ઉદાહરણ જોઈએ જેના પરથી આ ખ્યાલ આવશે.

1) લગભગ તમામ વ્યક્તિનો અનુભવ હશે કે બહારથી ઘરમાં આવ્યા બાદ ઘરનાં કપડાં પહેર્યા બાદ જ શાંતિનો અનુભવ થાય છે. શા માટે? બહારનાં કપડાંમાં અનેક વ્યક્તિઓની ઊર્જાની અસર થઈ હોય માટે. બહારથી આવી તરત સ્નાન કરવાથી હળવાશ અનુભવાય છે તેનું મુખ્ય કારણ એ છે કે સ્નાન બહારથી આયાત કરેલી ઊર્જા દૂર કરી દે છે.

2) વડીલો હંમેશા કોઈનાં કપડાં, ચંપલ, દાંતિયો વિગેરે વાપરવાની ના કહેતા. શા માટે? કારણ કે જે તે વસ્તુમાં તે પહેરેલ વ્યક્તિની ઊર્જા હોય.

૩) અનેકનો અનુભવ હશે કે નવાં કપડાં જો ધોયાં વગર પહેર્યા હોય તો પહેલી વાર પહેરતી વખતે કંઈ અકળામણ થાય. કારણ એ હોય છે કે એ કપડાંમાં અનેકનો હાથ અડ્યો હોય, તેની ઊર્જીની છાપ પડેલી હોય. વ્યક્તિ જેટલી વધુ સંવેદનશીલ તેટલી આ અસર વધારે.

4) મિત્રોને/સ્નેહીજનોને જેમને વારંવાર મળતાં હોઈએ, તેમને ત્યાં અજાણતાં એક નિશ્ચિત સોફા કે ખુરશી પર બેસી જઈએ છીએ. બેન્કમાં વર્ષના અંતે સ્ટેચ્યુટરી ઓડિટ આવે. એક ઓડિટર એકધારાં ૩/૪ વર્ષ સુધી આવ્યા. રૂમ નક્કી હતો જેમાં ૮/૧૦ ખુરશી હોય. તે હંમેશા એક જ ખૂણો અને એક ખાસ ખુરશી પર જ બેસી જતા. તેમને પોતાને પણ ખ્યાલ આવી ગયો અને વાતચીત દરમ્યાન તેમણે જણાવ્યું પણ ખરું કે તેમને એ જ ખુરશી પર બેસવાનું ખેંચાણ થતું.

5) ધ્યાન કરનારા લોકોને ખ્યાલ હશે કે અલગ-અલગ આસન પર બેસવાને બદલે તેમનાં પોતાનાં જ આસન પર બેસવાનું કહેવામાં આવે છે. ધ્યાનખંડમાં પાથરણું પાથરેલું હોય છતાં તેની પર પોતાનું આસન બિછાવીને બેસવાની સલાહ અપાય છે. ઊર્જાવાન સંત-મહાત્માઓ કોઈ પણ સ્થળ પર જાય ત્યારે તેમને માટે જે સોફા કે વ્યાસપીઠ નિશ્ચિત કરેલી હોય તેના પર પોતાનું જ આસન પાથરીને બેસે છે.

6) દિવાળી પર બોણી માટે નવી નોટનો આગ્રહ રાખવામાં આવે છે. શા માટે? કારણ કે બોણી રૂપે શુભેચ્છા આપવાની હોય છે. જૂની કરન્સીનું નાણાકીય મૂલ્ય તો એટલું જ રહે પરંતુ જેના હાથમાંથી તે કરન્સી પસાર થઈ હોય તે તમામની ઊર્જા તેમાં સંગ્રહિત થઈ હોય, જે દુઃખની પણ હોઈ શકે (જેમ કે કકળતી આંતરડીએ કોઈ ગરીબે તે નાણાં દવા પાછળ અથવા કોર્ટ કેઈસ પાછળ ખર્ચેલા હોય, પઠાણી વ્યાજ પેટે આપ્યા હોય તો તેની ઊર્જા પણ તેમાં હોય). નાનપણમાં રસ્તામાંથી 2 રૂપિયાની એક નોટ મળેલી જેમાંથી મેં કોલ્ડ્રીંક પીધું. ઘરે આવીને વાત કરી ત્યારે મારા પિતાશ્રી ખૂબ ખિજાયા હતા, કહ્યું કે કોના પૈસા હશે, બિચારાને શું તકલીફ પડી હશે, તેને માટે એ રકમની કિંમત શું હશે, આવી નોટને શા માટે હાથ લગાડ્યો, હાથ લગાડ્યો તો મંદિરમાં મૂકી દેવાય… વિગેરે વિગેરે. શા માટે પિતાશ્રી ખિજાયા તે ઘણા વર્ષો બાદ સમજ આવી.

7) ‘ક્રોસ ડ્રેસર – Cross Dresser) શબ્દથી ઘણાં લોકો પરિચિત હશે. એવા લોકો કે જે વિજાતીય વ્યક્તિનાં કપડાં પહેરી આનંદ મેળવે છે. . આ પ્રકારના કિસ્સા વિશેષતઃ કિશોરાવસ્થામાં અને અપરિણીત વ્યક્તિઓમાં વધુ જોવા મળે છે. આ લોકો બજારમાંથી આ જ કપડાં ખરીદી પણ શકે. પરંતુ તેમાં એમને આનંદ આવતો નથી. કુટુંબની કોઈ વ્યક્તિનાં વસ્ત્રો પહેરવાથી જ તેમને ખુશી મળે છે. અહીં પણ કારણ શરીરની ઊર્જા છે. એ જ કપડાં ખરીદીને લાવે તો તેમાં પહેરનાર વ્યક્તિની ઊર્જાનો અભાવ હોય, જયારે આ લોકોને તો પોતાની આસપાસની વ્યક્તિઓની ઊર્જા ખેંચતી હોય, માટે કોઈએ પહેરેલાં કપડાં જ તેમને આકર્ષે. તેમાં પણ વિજાતીય વ્યક્તિનાં આંતર્વસ્ત્રો પહેરવાનું ખાસ પસંદ કરે કારણ કે કપડાં જેટલાં શરીરથી નજીક તેટલી તેમાં તે વ્યક્તિની ઊર્જાની છાપ વિશેષ. મનોચિકિત્સકો પાસે આવા કિસ્સા આવતા હોય છે કારણ કે સામાજિક રીતે આપણે ત્યાં આ સ્વીકાર્ય નથી. મનોચિકિત્સકો કરતાં પણ વધુ કિસ્સાઓ કાઉન્સેલિંગ માટે આવતી વ્યક્તિઓ તરફથી બહાર આવે છે. વિદેશમાં ક્રોસ ડ્રેસિંગ હવે સામાન્ય થતું જાય છે. અનેક સેલિબ્રિટીઝ પણ પોતે ક્રોસ ડ્રેસર છે/રહી ચુક્યા છે તેમ સ્વીકારે છે, ક્રોસ ડ્રેસર્સ રસ્તા પર પરેડ પણ કરે છે.

8) અતિ સંવેદનશીલ વ્યક્તિઓ માટે ‘કપડાં પહેરવાં’ તે પણ અકળાવનારી વાત છે. દરેક વસ્ત્રમાં ઊર્જા તો રહેવાની જ. ધ્યાન દરમ્યાન અથવા સામાન્ય સંજોગોમાં પણ જેની ઊર્જા ઉપર વહેવા લગતી હોય તેમને વસ્ત્રોમાં કેદ થવું પસંદ ન પડે. માટે જ અનેક સંતો દિગંબર અવસ્થા પસંદ કરે છે.

વૈશ્વિક ઊર્જાનો પ્રભાવ રોજબરોજની જિંદગીમાં પણ કેટલો બધો છે તે આ ઉદાહરણો પરથી થોડો ખ્યાલ આવશે.

સાઈકોમેટ્રીના 3 પ્રકાર છે.

1) વસ્તુ આધારિત (Object) *સાઈકોમેટ્રી:

‘કોઈ વસ્તુ પર પડેલી ઊર્જાની છાપ પરથી માહિતી મેળવવી’ તે સૌથી વધુ જોવા મળતો પ્રકાર છે. સ્પર્શ શરીરના ક્યા ભાગથી કરવો તે વિષે દરેક સાઈકિકને અલગ પસંદગી હોય છે. કોઈ સાઈકિક વસ્તુને હાથથી સ્પર્શ કરવાનું પસંદ કરે છે, કોઈ કપાળ કે ચહેરા પર સ્પર્શ કરાવીને કે કોઈ નાભિ ચક્ર પર વસ્તુનો સ્પર્શ કરાવીને માહિતી મેળવે છે.

આ પ્રકારની સાઈકોમેટ્રીનું એક ઉદાહરણ સાઇકીક ક્રેગ પારકરનું શરૂઆતમાં જ જોયું. એ સિવાય જેનો પ્રત્યક્ષ અનુભવ મને થયો છે તેવા બે ઉદાહરણ:

મારા એક મિત્રનો તરુણ પુત્ર હોસ્ટેલમાં ભણતો હતો. વેકેશનમાં વતન આવવા માટે નીકળ્યો અને અચાનક વચ્ચેથી જ ગૂમ થઈ ગયો. તમામ પ્રયત્નો છતાં આશરે 2 વર્ષ સુધી મળ્યો ન હતો. વર્ષ 2001માં સમર્પણ ધ્યાનયોગના પ્રણેતા પ.પૂ. શ્રી શિવકૃપાનંદ સ્વામીજીને પુત્રનો ફોટો બતાવ્યો. તેમણે તરત કહેલું કે એ તરુણનું મૃત્યુ અકસ્માતમાં થઈ ચૂક્યું છે. એ વાતને 19 વર્ષ થઈ ગયા. હજી પણ તે પુત્રની કોઈ ભાળ મળી નથી. આ જ પ્રકારનો એક ગૂમ થયેલા બાળકનો કિસ્સો 2005માં તેમની પાસે મુકેલો, જવાબ એ હતો કે ‘મૃત્યુ થઈ ચૂક્યું છે, કોઈ નજીકની વ્યક્તિનો તેમાં હાથ છે.’ તે બાળકના પણ કોઈ ખબર આજ સુધી મળ્યા નથી.

2) વ્યક્તિ આધારિત(Person) *સાઈકોમેટ્રી:

દરેક વ્યક્તિ એક વિશિષ્ટ આભામંડળ ધરાવે છે. જયારે કોઈને પણ મળીએ ત્યારે અથવા કોઈ પણ વ્યક્તિ વિષે વિચારીએ ત્યારે જે-તે વ્યક્તિના આભામંડળથી પ્રભાવિત થઈએ. કેટલાં સંવેદનશીલ છીએ તે મુજબ તે પ્રભાવ પડે. અત્યંત સંવેદનશીલ હોઈએ તો કોઈ વ્યક્તિનું નામ લેવા સાથે જ તેના આભામંડળથી પ્રભાવિત થઈ જવાય, પ્રભાવ હકારાત્મક પણ હોઈ શકે, નકારાત્મક પણ. લોકવ્યવહારની ભાષામાં એમ બોલાય પણ છે કે ‘સવારમાં એનું (XYZ) કયાં નામ લીધું’ અથવા તો ‘સવારમાં તો કોઈ સારું નામ લે’.

કોઈ પણ પરિચય વિના અમુક વ્યક્તિને જોઈ ખુશી થાય, તેમની સાથે વાત કરવાનું મન થાય, તેમના પ્રત્યે આકર્ષણ થાય. તેનાથી વિરુદ્ધ કોઈ વ્યક્તિને જોઈને અભાવ ઉત્પન્ન થાય, તેનાથી દૂર ભાગવાનું મન થાય, તેને જાણતાં પણ ન હોઈએ, તેણે આપણું કોઈ નુકશાન ન કર્યું હોય છતાં આવી લાગણી થાય. એ જ રીતે નવી વ્યક્તિ સાથે શેઇક-હેન્ડ કરીએ તો કોઈની સાથે અજાણતાં જ લાંબો સમય કરીએ, કોઈના હાથમાંથી હાથ ખેંચી લેવાનું મન થાય. આ પ્રકારની લાગણીનો અનુભવ લગભગ તમામને હશે. અર્થ એવો કાઢી શકાય કે દરેક વ્યક્તિ માર્યાદિત રીતે તો સાઇકોમેટ્રિસ્ટ છે જ.

જેનો સાઈકિક પાવર અત્યંત વધારે હોય તેમને માટે એ પણ શક્ય છે કે વ્યક્તિના ફક્ત ઉલ્લેખ સાથે જ તેના વિષે બધી માહિતી પ્રાપ્ત કરી લે, ભલે તે વ્યક્તિને કોઈ દિવસ જોઈ ન હોય કે તેનાં વિષે કોઈ માહિતી ન હોય. અધ્યાત્મની શક્તિ કેટલી છે તે દર્શાવવા માટે ઇંગ્લેન્ડમાં Venus TV પર વર્ષ 2006માં પ.પૂ. શ્રી શિવકૃપાનંદ સ્વામીજી ઉપસ્થિત થયેલા. ચેનલ પર ફોન કરી વિશ્વભરમાંથી કોઈ પણ વ્યક્તિ કંઈ પણ સવાલ પૂછી શકે તેવું આયોજન હતું. તદ્દન અપરિચિત વ્યક્તિઓ ફોન કરતી હતી. તેમના કહ્યા વગર જ સ્વામીજી જે તે વ્યક્તિના પ્રશ્નો અને સમાધાન આપતા હતા. તે વ્યક્તિ પર ધ્યાન જતાં સાથે જ સ્વામીજીને તેમના વિષે માહિતી મળી જતી હતી. આ કાર્યક્રમ https://youtu.be/zn2pcg7eSs8 પર નિહાળી શકાશે. કાર્યક્રમનો મોટો ભાગ હિન્દીમાં છે.

૩) ઘટના આધારિત – Event Psychometry:

દરેક ઘટના જે તે સ્થળે પોતાની છાપ છોડે. ધ્યાનખંડમાં, પ્રાચીન મંદિરોમાં શાંતિ પ્રાપ્ત થાય. દવાખાનામાં વિષાદની ઊર્જા તો લદાખમાં લેહનાં એરપોર્ટ પર ઉતરતાં જ દેશભક્તિની ઊર્જાનો તીવ્ર અનુભવ થાય. ઉત્તમ દાખલો મહાભારત છે. જ્યાં યુદ્ધ થયેલું છે તે વિસ્તારમાં એટલે કે દિલ્હીમાં આજે પણ લોકો વધુ આક્રમક છે. સંવેદનશીલ સાઈકિકને આવી જગ્યા પર જતાં જ ખ્યાલ આવે કે ત્યાં ક્યાં પ્રકારની પ્રવૃત્તિ થઈ હશે. વધુ શક્તિશાળી સાઈકિકને ફક્ત એ સ્થળનું નામ આપતાં જ તે જગ્યા વિષે ઘણી માહિતી પ્રાપ્ત થઈ જાય. ડોક્ટર મસારુ ઈમોટોના પાણી પરના અનેક વૈજ્ઞાનિક પ્રયોગોથી (વિગતો લેખ ક્રમાંક 11માં) એ સાબિત થઈ ચૂક્યું છું કે જુદી-જુદી જગ્યાનાં પાણીનાં આંદોલનો અલગ-અલગ હોય છે.

સાઈકોમેટ્રીના શું ઉપયોગ થઈ શકે, દરેક વ્યક્તિ પોતાની આ શક્તિ કઈ રીતે વિકસાવી શકે, ક્યા વૈજ્ઞાનિક સિદ્ધાંતો આ શક્તિ પાછળ કાર્ય કરે છે, કોઈ પણ વ્યક્તિમાં આ શક્તિ કેટલી હદે છે તે ચકાસવાના મુદ્દાઓ વિગેરે વાતો લેખ 7 માં જોઈશું. આજે અહીં વિરમું છું.

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૫) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

કલેયરવોયન્સ અને કલેયરએમ્પથી બાદ હવે સમજીએ ક્લેયરઓડિયન્સ.

અત્યંત સરળ શબ્દોમાં કહીએ તો ‘સામાન્ય વ્યક્તિથી, સામાન્ય સંજોગોમાં, શ્રવણેન્દ્રિય (કાન) દ્વારા ન સાંભળી શકાય તેવા દૂરના અથવા અન્ય લોકમાંથી આવતા હોય તેવા ગેબી અવાજો સાંભળી શકવાની અતીન્દ્રિય શક્તિ એટલે ક્લેયરઓડિયન્સ. જે વ્યક્તિ પાસે આવી શક્તિ હોય તે કહેવાય ક્લેયરઓડિયન્ટ.’

 આસપાસ એક પણ વ્યક્તિ ન હોય અને કોઈ અચાનક તમારું નામ બોલ્યું એવો કોઈ અનુભવ છે?v

 કાનમાં ભમરાનો ગુંજારવ થયા કરતો હોય, ડોક્ટર પાસે જઈએ, એ કહે કે તમને કાનમાં કંઈ તકલીફ નથી – આવું બન્યું છે?

આસપાસના લોકોએ ન સાંભળ્યા હોય તેવા અવાજ અથવા સંદેશ સંભળાય છે?

ચિંતા કરવાની જરૂર નથી. બની શકે કે તમે ક્લેયરઓડિયન્ટ છો. હવે બે વિકલ્પ રહે. જો ભય લાગતો હોય તો એ જ અવાજને આભાર માની, પ્રાર્થના કરી અવાજ બંધ કરાવી શકાય. અથવા એ જ અવાજને વિનંતી કરી શકાય કે તમારી ક્લેયરઓડિયન્સ ક્ષમતા વધુ વિકસાવે જેથી આપ સદૈવ આ માર્ગદર્શન મેળવી શકો. બીજો વિકલ્પ હંમેશા લાભપ્રદ સાબિત થશે, પરિણામરૂપે ખુદની વાઈબ્રેશનલ ફ્રીક્વન્સી વધશે, DNA Upgrade થશે. 90% જેટલાં DNA સામાન્ય રીતે કાર્યરત નથી હોતા, દરેક માટે તે અપગ્રેડેશનની શક્યતાઓ અપરંપાર છે.

અનુભવના અભાવે કોઈને કદાચ પ્રશ્ન એ ઉઠે કે આવી કોઈ શક્તિ હોઈ શકે ખરી? ચોક્કસ હોઈ શકે. અનેક દાખલાઓ નોંધાયેલા છે. થોડા જોઈએ.

ઇતિહાસમાં અતિ પ્રસિદ્ધ કોઈ ક્લેયરઓડિયન્ટ હોય તો તે જોન ઓફ આર્ક છે. 15મી સદીમાં ઇંગ્લેન્ડ અને ફ્રાન્સ વચ્ચે ચાલેલા ‘Hundred Years War’ નામક અતિ લાંબા યુદ્ધમાં તે સમયની આ ટીનેજર છોકરીને જે ગેબી અવાજો સંભળાતા તેના આધારે ફ્રેન્ચ લશ્કરને તે માર્ગદર્શન આપતી, પરિણામે ફ્રાન્સ તે લાંબી લડાઈ જીતી ગયું. વર્ષ 1431માં 19વર્ષની ઉંમરમાં જ જોનનું મૃત્યુ થયું. આશરે 500 વર્ષ બાદ 1920માં તેમને ‘Saint of the Catholic Church’ ઘોષિત કરવામાં આવ્યા.

કલેયરઓડિયન્ટ કહી શકાય તેવી વ્યક્તિઓમાં આ શક્તિ વધતાં-ઓછાં પ્રમાણમાં હોઈ શકે. એ સિવાય અનેક વ્યક્તિઓ એવી હોય છે કે જે ધ્યાન દરમ્યાન અથવા કોઈ ખાસ સંજોગોમાં આવા ગેબી અવાજો સાંભળી શકે. આવી વ્યક્તિ પોતાની અતીન્દ્રિય શક્તિઓને અમુક પ્રયત્નો દ્વારા વિકસાવી શકે. ભારતીય લશ્કરમાં એવા બનાવો રેકોર્ડ પર છે કે જેમાં કોઈ ગેબી અવાજ કોઈને સંભળાયો હોય અને જેને પરિણામે જીવનદાન મળ્યું હોય. વિશિષ્ટ સંજોગોમાં આ શક્તિ બહાર આવી હોય તેવું બની શકે. 1971 યુદ્ધ દરમ્યાનનો આવો એક દિલધડક અનુભવ કેપ્ટન નરેંદ્ર ફણસે દ્વારા https://davdanuangnu.wordpress.com/2019/…/29/જીપ્સીની-ડાયરી- ૨૮-કેપ્ટન પર નોંધેલો છે. તે લાંબા અનુભવમાંથી કલેયરઓડિયન્સ વાળો ભાગ નીચે મુજબ છે.

“અમે બન્ને ખુલ્લા મેદાનમાં હતા ત્યાં અચાનક મારા અંતર્મને ગેબી પણ ભૌતિક રીતે અશ્રાવ્ય ગણાય તેવા અવાજમાં હુકમ સાંભળ્યો: જમીન પર પોઝિશન લે. (પોઝિશન લેવાનો અર્થ થાય છે, ગોળીબાર કે બોમ્બથી બચવા માટે જમીન પર ચત્તા પડી જવું અને ચિત્તાની જેમ ઘસડાતા સુરક્ષિત સ્થાન પર જઈ દુશ્મનના ગોળીબારને વળતો જવાબ આપવો). મેં ઠાકુરસાહેબનો હાથ પકડ્યો અને હુકમ આપ્યો, ડાઉન. જેવા અમે બન્ને જમીન પર ચત્તા પડ્યા કે અમે અમારી ઉપરથી ઊડી જતા દુશ્મનના સુપરસોનિક જેટની ગર્જના સાંભળી. તેણે અમારી ચોકી પર ઝીંકેલો 500 પાઉન્ડર બોમ્બ ઠાકુરસાહેબ અને હું જે જગ્યાએ પોઝિશન લઈને પડ્યા હતા, ત્યાંથી વીસેક મીટર પર પડ્યો. ધરતી એવી ધ્રૂજી, જાણે અમારા શરીરની નીચે જ ધરતીકંપનું એપિસેન્ટર હતું. બોમ્બનો જે સ્ફોટ થયો તેના અવાજથી અમારા કાન કલાકો સુધી બહેરા થઈ ગયા. ઠાકુરસાહેબ અને મારા શરીર અને માથા પરથી બોમ્બની કિલો–કિલો વજનની અનેક કરચ સુસવાટા કરતી નીકળી ગઈ. અમે ચાલતા રહ્યા હોત તો અમારા બન્નેનાં શરીરના ફુરચા ઊડી ગયા હોત.”

રસિયા અને અમેરિકાના લશ્કરમાં સાઈકિક સ્પાયનો ઉપયોગ છેક 1978થી થતો આવ્યો છે. અમેરિકાના લશ્કરમાં સાઈકિક સ્પાયનું એક પૂરું યુનિટ ‘સ્ટાર ગેઇટ’ નામથી કાર્યરત હતું.

કોઈ અતિ શક્તિશાળી સાઈકિકની અથવા મહાત્માની હાજરીમાં બીજાં લોકોની ચેતનાનું સ્તર એટલું ઊંચું જઈ શકે કે તેઓ પણ સામાન્ય રીતે ન સાંભળી શકાય તેવા અથવા દૂરના અવાજ સાંભળી શકે. અનેક લોકોની હાજરીમાં બનેલા બે ઉદાહરણ: 2005 જાન્યુઆરીમાં રાજકોટ-મોરબી રોડ પર બેડી ગામ પાસે આવેલ એક સ્કૂલમાં અમારા ગુરુદેવની ઉપસ્થિતિમાં એક મેડિટેશન રિટ્રીટનું આયોજન થયેલું જેમાં આશરે 100 વ્યક્તિએ ભાગ લીધેલો. 25 એકરનાં વિશાળ કોમ્પ્લેક્સમાં શિબિરાર્થીઓ સિવાય કોઈ જ વ્યક્તિનો રહેવાશ ન હતો. રેડીઓ-TV જેવાં કોઈ ઉપકરણો પણ ન હતાં. ધ્યાન શરું થયું. અચાનક ધ્યાનમાં કોઈ નાટક ચાલતું હોય તેવા અવાજો સંભળાયા. થોડી વારમાં બીજું કોઈ સંગીત સંભળાયું. ફરી પાછા કંઈ સંવાદો સંભળાયા. મને લાગ્યું કે આ મારો મનોવ્યાપાર છે. ધ્યાન પૂરું થયું. 5/10 મિનિટ પછી એક સાયન્સના શિક્ષક ઉભા થયા. તેમણે બીજાને પૂછવાનું શરુ કર્યું કે તેમને કોઈ અવાજો સંભળાયા કે નહિ? અંતમાં ખ્યાલ આવ્યો કે ઘણાં લોકોને તે દિવસે વિવિધ અવાજો સંભળાયા હતા.

બીજો આવો બનાવ હજારો માણસોની હાજરીમાં નવસારીમાં 2004 ડિસેમ્બર દરમ્યાન સંસ્કરભારતી સ્કૂલમાં અમારા ગુરુદેવના પ્રવચનો દરમ્યાન બનેલો જેમાં ચાલુ પ્રવચને અચાનક બ્રિટિશ ઉચ્ચારોમાં ઇંગલિશ સંવાદો આવવા લાગ્યા જે રેકોર્ડિંગમાં પણ આવી ગયા છે.

મેડિકલ સાયન્સ સાઈકિક શક્તિઓના અનુભવોને સમજવા અસમર્થ છે. પરિણામે એવું બની શકે કે સાઈકિક અનુભવોને રોગ તરીકે સમજી બેસે. આવી સૌથી વધુ ગૂંચવણ થતી હોય તો તે ક્લેયરઓડિયન્સ બાબતમાં છે. ક્લેયરઓડિયન્ટને મેડિકલ સાયન્સ સ્કિઝોફ્રેનિયાના દર્દી સમજી લેવાની ભૂલ કરે તેમ બની શકે. સ્કિઝોફ્રેનિયામાં પણ વ્યક્તિને બીજાને ન સંભળાય તેવા અવાજ સંભળાતા હોય છે. પરંતુ તે અવાજ કાન દ્વારા સંભળાય છે, કાલ્પનિક હોય છે. સાઈકિકને સંભળાતા કાન અને ગળાની વચ્ચેના ભાગમાંથી સંભળાય છે, મનની અંદર એક સૂક્ષ્મ અવાજ પ્રગટ થાય છે, આજુબાજુના સામાન્ય અવાજોની બહારના શબ્દો અથવા અવાજો સાંભળી શકાય છે.

સાઈકિક લોકો આ અવાજને કંટ્રોલ પણ કરી શકે, માનસિક બીમાર માટે એ શક્ય નથી. ક્લેયરઓડિયન્ટ જે અવાજો સાંભળે છે તે વધારે ટૂંકા હોય, તેના પ્રશ્નોના જવાબમાં પણ હોય, માર્ગદર્શન રૂપે હોય, કરુણાસભર હોય, મૃદુ હોય. સ્કિઝોફ્રેનિયામાં સંભળાતા અવાજો આ પ્રમાણે જ હોય તેમ જરૂરી નથી. કદાચ ડરામણા હોય છે.

આવા અવાજ શા માટે સંભળાય?

મનુષ્યમાત્રને અલગ-અલગ આધ્યાત્મિક પથદર્શક હોય છે. ગુરુ તો પથદર્શક હોય જ પરંતુ એ સિવાય મૃત્યુ પામેલી ઘરની કોઈ વ્યક્તિ પણ સૂક્ષ્મ માર્ગદર્શન આપતી હોય તેવું બને. તે સિવાય કોઈ પણ હિતેચ્છુ (જે સ્થૂળ દેહમાં નથી) આ પ્રમાણે માર્ગદર્શક હોઈ શકે. આ આધ્યાત્મિક માર્ગદર્શકો – સ્પિરિચ્યુઅલ ગાઇડ્સ સતત માર્ગદર્શન આપવાના પ્રયત્નો કરતા રહે. જો અતીન્દ્રિય શક્તિ વિકાસ પામી હોય તો આ માર્ગદર્શન પ્રાપ્ત થઈ શકે.

પોતાનામાં આવી શક્તિ છે અથવા વિકસાવી શકાય તેમ છે તે જોવા માટે ક્લેયરઓડિયન્ટનાં અમુક લક્ષણો તપાસીએ.

1) આસપાસ કોઈ ન હોય અને છતાં એમ લાગે કે કોઈ નામ લઈને બોલાવે છે (ધ્યાન દરમ્યાન આ અનુભવ ઘણાંને થયો હશે)

2) સંગીત પ્રત્યે ખાસ લગાવ હોય

3) અતિ સૂક્ષ્મ અવાજ પણ સાંભળી શકાય

4) કોઈ ગેબી અવાજ દ્વારા વિવિધ સંજોગોમાં માર્ગદર્શન મળતું હોય

5) રેડીઓ ફ્રીક્વન્સી જેવા અવાજો સંભળાતા હોય

6) કોઈ જુદી જ ભાષાના શબ્દો સંભળાતા હોય.

7) જાત સાથે સંવાદો સતત ચાલુ રહેતા હોય. અરીસા સાથે વાતો કરતા હોઈએ

8) ઘોંઘાટ, TVનો મોટો અવાજ વિગેરે અત્યંત તકલીફ આપે

9) કાલ્પનિક મિત્રો હોય જેમની સાથે વાતો પણ કરતા હોઈએ

10) સંગીત દ્વારા બીજી જ દુનિયામાં પહોંચી જતા હોઈએ

11) સંગીતની ધૂન બનાવી શકીએ, ગીત લખી શકીએ

12) એટલાં બધાં લોકો સલાહ માંગતા હોય કે વ્યવસાયિક કાઉન્સેલર બની શકીએ (તાત્પર્ય એ છે કે આવી વ્યક્તિના માધ્યમથી કોઈ બીજી જ શક્તિ માર્ગદર્શન આપી રહી હોય)

13. કાનમાં કંઈ ગણગણાટ ચાલુ રહે. ડોક્ટર કહે કે કાન બરાબર છે, માનસિક સમસ્યા લાગે છે

14. કોઈ પણ નવી વસ્તુ શીખવા માટે વાંચવા કરતાં સાંભળવું વધુ પસંદ હોય. કોઈ પુસ્તક વાંચવા કરતા ઓડીઓ બુક વધુ પસંદ આવે

15) બીજી વ્યક્તિ જે વિચારતી હોય તે ઘણી વખત શબ્દો દ્વારા સંભળાય

16) ‘આ વાત બીજા લોકો કદાચ નહિ સમજી શકે’ તે સમજણને કારણે વ્યક્તિ મનની વાત મનમાં જ રાખે, કોઈને કહે નહિ

17) વ્યક્તિ સર્જનાત્મક હોય; ઘણાં નવા આઈડિયા આવતા હોય

18) સ્નાન દરમ્યાન ઘણા નવા આઈડિયા આવે

19) સ્નાન દરમ્યાન જાત સાથે બહુ ઊંડું જોડાણ થઈ જાય, ધ્યાનમાં ઊતરી પડાય

20) તે વ્યક્તિના શબ્દો લોકોને બહુ શાંતિપ્રદ લાગે (તેની જાણ બહાર બીજી જ કોઈ શક્તિ તેની પાસે કંઈ બોલાવતી હોય)

21) ઘણી દૂર હોય તેવી વ્યક્તિઓની વાતચીત પણ સંભળાય.

આ લક્ષણો પરથી એમ લાગતું હોય કે આવું કંઈ તો મારામાં છે અને આ શક્તિ વિકસાવવી છે તો શું કરવું તે જોઈએ.

1) લિસનીંગ સ્કિલ વિકસાવવી જોઈએ. ‘સાંભળવું’ તે મોટી કળા છે. બાળક એક ઉંમરે સ્વાભાવિક રીત જ બોલતા શીખી જાય અને અવાજ સાંભળી શકે એટલે સામાન્ય રીતે ખ્યાલ આવતો નથી કે જે શીખવા માટે ખૂબ પ્રયન્ત કરવા જોઈએ તેવી આ કળા છે. ‘કોઈ પણ પ્રકારની ખલેલ પહોંચાડ્યા વગર ધ્યાનથી સાંભળવું’ અને ફક્ત ‘સાંભળવું’ તે બંને વચ્ચે આસમાન-જમીનનો તફાવત છે. અતીન્દ્રિય રીતે અવાજ સાંભળવા મળે તે મોટા ભાગે અત્યંત મૃદુ અવાજમાં હોય. જો લિસનીંગ સ્કિલ બરાબર ન હોય તો ‘સાંભળ્યા છતાં ન સાંભળ્યું’ જેવી સ્થિતિ થાય.

2) ધ્યાનથી નોંધવું જોઈએ કે મોટા ભાગે અવાજ ક્યાંથી સંભળાય છે – બહારથી કે અંદરથી, જમણી બાજુથી કે ડાબી બાજુથી. સામાન્ય રીતે આંતરિક અવાજ હશે. મોટા ભાગના કિસ્સામાં અવાજ જમણી બાજુથી આવવો જોઈએ. મગજનો તે ભાગ આંતર્સ્ફુરણાનો છે. ડાબો ભાગ વધુ તાર્કિક છે. ક્યાંથી અવાજ આવે છે તે ચોક્કસ ખ્યાલ આવશે તો ભવિષ્યમાં આવા અવાજ વધુ સારી રીતે સાંભળી શકાશે.

3) એ નોંધ લેવાની આદત કેળવવી જોઈએ કે સામાન્ય રીતે અવાજ ક્યારે સંભળાય છે. કોઈ ચોક્કસ સમયે સંભળાય છે? ધ્યાન દરમ્યાન જ સંભળાય છે? ઊંઘમાં સંભળાય છે? સ્નાન સમયે સંભળાય છે? આ પ્રકારની નોંધ લેવાથી જે તે સમયે વધુ સચેત રહી આ પ્રકારના અવાજ સાંભળી શકાશે.

4) જયારે આ અવાજ સંભળાય ત્યારે તે અવાજને, તે સંદેશ આપનાર માર્ગદર્શકને મનોમન ધન્યવાદ આપી તેમનું નામ જાણવા માટે પ્રાર્થના કરવી જોઈએ. કોઈ પ્રશ્ન હોય તો તે પણ પૂછી શકાય. બાદમાં એ નોંધવાનું રહે કે જવાબ આવ્યો? આવ્યો તો ક્યારે આવ્યો અને કઈ રીતે આવ્યો.

5) મોટા ભાગની અતીન્દ્રિય શક્તિ આજ્ઞાચક્ર સાથે સંબંધિત છે. ક્લેયરઓડિયન્સ તેમાં અપવાદ છે. વિશુદ્ધિ ચક્ર સાથે તેનો સંબંધ છે. માટે વિશુદ્ધિ ચક્ર સશક્ત કરવા માટેના પ્રયત્ન કરવા જોઈએ. આ કઈ રીતે થઈ શકે તે લેખ ક્રમાંક 13 અને 14માં વિગતવાર ચર્ચા કરેલ છે.

આ સાથે કલેયરઓડિયન્સ વિષે ચર્ચા સમાપ્ત કરીએ છીએ. હવે પછીના લેખમાં એક વધુ સાઈકિક પાવર વિષે વાત કરીશું .

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

શું તમે સાઈકિક છો? (૪) – જિતેન્દ્ર પટવારી

“📚✒️ લેખક : જિતેન્દ્ર પટવારી
http://www.facebook.com/Self-Tune-In-274610603329454/
(jitpatwari@rediffmail.com)
Cell:7984581614

©️આ લખાણ લેખક દ્વારા કોપીરાઈટ સુરક્ષિત છે; તેમાં કોઈ પણ પ્રકારનાં ફેરફાર માટે તેમની પૂર્વસંમતિ આવશ્યક છે.

ક્લેયરએમ્પૅથ એટલે શું તે લેખ 3 માં સમજ્યા. તેમની અમુક લાક્ષિણકતાઓ જોઈ. તેમની વધુ લાક્ષણિકતાઓ હવે જોઈએ.

19) બીજાને હંમેશા મદદરૂપ બનવાની ભાવના

20) અમુક લોકો પાસે તેમની ઊર્જા એકદમ જલ્દી ખેંચાઈ જાય – શારીરિક અને માનસિક બંને

21) સામેની વ્યક્તિ ખોટું બોલતી હોય તે તરત જ ખ્યાલ આવી જાય

22) અમુક સમયે તદ્દન ભાવહીન સ્થિતિ હોય જયારે અમુક ક્ષુલ્લક બાબતોમાં પણ ભાવુક થઈ જવાય, એવી વાતો કે જેની સાથે ખરેખર કંઈ નિસ્બત ન હોય – જેમ કે TV સીરિયલમાં કે ચલચિત્રમાં બનતો પ્રસંગ કે સમાચારપત્રનું કોઈ વાંચન

23) પ્રકાશ, અવાજ અને સુગંધ પ્રત્યે વધુ સંવેદનશીલ હોય

24) તેમની છાપ (ખાસ કરીને નાની ઉંમરે) બહુ ભાવપ્રધાન વ્યક્તિની હોય. બધા શિખામણ આપી ગયા હોય “આટલા બધા સેન્સિટિવ નહીં રહેવાનું, નહીંતર હેરાન થઈએ”

25) દુઃખી વ્યક્તિઓ તેમની તરફ વધુ ખેંચાય. લોકોને એમ થાય કે આ વ્યક્તિ પાસે મારા પ્રશ્નોનું સમાધાન હશે

2૬) જે વ્યક્તિને એમ્પૅથ પ્રત્યે લાગણી કે માન હોય તેવી વ્યક્તિનાં સ્પંદનો એમ્પૅથ બહુ વધારે સારી રીતે ઉઠાવી લે

27) નજીક હોય તે કરતાં પણ દૂર હોય તેવી વ્યક્તિનાં શારીરિક/માનસિક સ્પંદનો એમ્પૅથને જલ્દી અને તીવ્રતાથી અસર કરે. ફોન પર કે ચેટ દરમ્યાન સામેની વ્યક્તિનાં સ્પંદનો એમ્પૅથને વધુ મહેસૂસ થાય

28) સંવેદનશીલતામાં વધઘટ આવતી રહે. કોઈ વખત પૂનમ તો કોઈ વખત અમાસ. જુદા-જુદા સમયે અને જુદી-જુદી વ્યક્તિ સાથેની સંવેદનશીલતા જુદી-જુદી હોઈ શકે

29) સામાન્ય રીતે જાત પરથી અંકુશ ગુમાવે નહિ; જો કોઈ વખત ગુમાવે તો તેના માટે અફસોસ અનુભવે

30) શાંતિપ્રિય હોય; વ્યક્તિઓ સાથેનો સંઘર્ષ થોડું જતું કરીને પણ ટાળવાની વૃત્તિ હોય

31) ખુદની જરૂરિયાત અવગણે

32) પોતાની લાગણીઓ વિષે વધુ ખૂલીને બોલી શકે. સામાજિક સંકોચ તેમને ઓછો રહે

33) તેમની સાથે વાત કરતી વ્યક્તિના ટોન અને બોડી લેન્ગવેઇજનું સાચું અર્થઘટન કુદરતી રીતે જ કરી લે

34) સામેની વ્યક્તિના હાસ્ય પાછળ છુપાયેલી ઉદાસી પણ પકડી શકે

35) હથેળીઓમાં કે આંગળીઓમાંથી કે શરીરના કોઈ પણ ભાગમાંથી સતત ઊર્જા પ્રવાહ નીકળી રહ્યો હોય તેવી અનુભૂતિ રહે

3૬) શરીરમાં અચાનક ઠંડીના લખલખાં આવતાં હોય, આંચકા પણ આવતા હોય

37) તેમના અવાજથી પણ હીલિંગ થતું હોય

3૮) તેમની ઊર્જા બીજા લોકોની ઊર્જામાં સતત ભળતી હોવાથી તેમને થાક જલ્દી લાગે.

39) કોઈનાં શારીરિક/માનસિક સ્પંદનો સાથે રોગ પણ ઉઠાવી લે, કોઈ વાર ટૂંકા ગાળા માટે તો કોઈ વાર કાયમ માટે. હિલર્સને આ પ્રકારના અનુભવ ઘણી વખત થતા હોય છે. એમ્પૅથનું શરીર તો કુદરતી રીતે હીલિંગ કરતું રહે છે. માટે તેમને આ શક્યતા વધી જાય

40) ઘણા લોકો તેમને કહેતા હોય કે તમારી પાસે આવવાથી કે માત્ર તમારી સાથે વાત કરવાથી પણ શાંતિ મળે છે.

એમ્પૅથના પ્રકાર:

આ પ્રકારની શક્તિ ધરાવનાર વ્યક્તિઓને વિવિધ પ્રકારોમાં વહેંચી શકાય. એમ્પૅથ પાસે આમાંથી કોઈ એક અથવા વધુ સાઈકિક શક્તિ હોઈ શકે.

1. શારીરિક એમ્પૅથ:

આ પ્રકારના એમ્પૅથ બીજાનાં શારીરિક સ્પંદનો/સ્થિતિ કેચ કરે. બીજી વ્યક્તિને શરીરમાં કોઈ જગ્યાએ દુખાવો હોય, બળતરા હોય તેનો એમ્પૅથને ખ્યાલ આવી જાય, એવી રીતે ખ્યાલ આવે જાણે તેનું શરીર અરીસો હોય અને સામેની વ્યક્તિનું પ્રતિબિંબ આપતું હોય. કોઈ એમ્પૅથને તો આ પ્રતિબિંબ મૂળ વ્યક્તિનું ધ્યાન પડે તેનાથી પણ પહેલાં પડી જાય છે. દા.ત. એમ્પૅથને પહેલાં ખ્યાલ આવે કે સામેની વ્યક્તિના પેટમાં કે બીજી જોઈ જગ્યાએ તકલીફ છે, જયારે મૂળ વ્યક્તિને પછીથી ખ્યાલ આવે. કોઈ એમ્પૅથની આ શક્તિઓ એટલી વિકસેલી હોય કે બીજી વ્યક્તિની અત્યંત આંતરિક નાજુક પરિસ્થિતિનો પણ તેમને ખ્યાલ આવે. ઉદાહરણ: મારા એક એમ્પૅથ મિત્ર (પુરુષ) ભારતમાંથી ઈઝરાયલમાં કોઈ યુવતી સાથે ચેટ કરતા હતા. અચાનક તેમણે નાભિથી નીચેના ભાગમાં કંઈ જુદા પ્રકારનાં તીવ્ર સ્પંદન અનુભવ્યાં. તે યુવતી સાથે એ અંગે વાત કરતા ખ્યાલ આવ્યો કે બરાબર એ જ સમયે તે યુવતી પીરીયડ્ઝમાં આવી હતી. મારી જાણીતી એક યુવતીની તકલીફવાળી ગર્ભાવસ્થાની પીડા કોઈ સંતે ઊંચી એમ્પૅથ સ્થિતિને કારણે ઉઠાવી હોય તેવી ઘટનાનો પણ મને ખ્યાલ છે.

2. ઈમોશનલ એમ્પૅથ:

આ પ્રકારના એમ્પૅથ બીજા લોકોની માનસિક સ્થિતિ – ખુશી, ગુસ્સો, ઉદાસી – કેચ કરે. તે વ્યક્તિને પણ ખ્યાલ ન હોય તેવો અર્ધજાગૃત મનમાં દબાયેલો ગુસ્સો એમ્પૅથમાં ટ્રાન્સફર થઈ શકે. પરિણામે એમ્પૅથને શારીરિક રીતે માથાનો દુખાવો અને માનસિક રીતે ગુસ્સો ભેટમાં મળે. ચક્રોની ચર્ચા વખતે જોયેલું કે મનમાં ભરી રાખેલો ગુસ્સો આજ્ઞાચક્રને દૂષિત કરે. આ ઊર્જા જ્યારે એમ્પૅથમાં ટ્રાન્સફર થાય ત્યારે તેને માથાનો દુખાવો થાય. મનમાં ગુસ્સો ભરી રાખવો તે જે તે વ્યક્તિ માટે કેટલો ઘાતક છે તે આ પરથી સમજી શકાશે.

મારા પરિચિત એક મહિલા એમ્પૅથ એટલી હદે આ પ્રમાણે બીજાની લાગણીઓ ઉઠાવી લે છે કે તેમના પતિ જયારે ઓફિસેથી ઘરે પાછા ફરે ત્યારે પત્નીના મૂડ પરથી જ તેમને ખ્યાલ આવી જાય છે કે તેણીએ કોઈ એવી વ્યક્તિ સાથે આજે વાત કરી છે કે જેના આજ્ઞાચક્રમાં ગુસ્સારૂપી કચરો ભર્યો હશે.

3. જીઓમેન્ટિક એમ્પૅથ:

આવી વ્યક્તિ કોઈ પણ સ્થળની ઊર્જાથી પ્રભાવિત થાય છે. જરૂરી નથી કે તે સ્થળની આ વ્યક્તિ પ્રત્યક્ષ મુલાકાત લે. કોઈ સ્થળનો ફોટો જોવાથી કે ફક્ત ઉલ્લેખથી પણ આ પ્રકારના એમ્પૅથને એ સ્થળ સાથે લગાવ અથવા અભાવ થઈ શકે કારણ કે તે સ્થળની ઊર્જા, ત્યાંનાં આંદોલનોની ગાઢ અસર તે એમ્પૅથ પર થતી હોય. જે સ્થળ તેમણે જોયું પણ ન હોય તેના પ્રતિ પણ તેમનું તીવ્ર ખેંચાણ થતું હોય તેવું બની શકે. યુરોપ પ્રવાસ દરમ્યાન અમારી સાથે એક એમ્પૅથ દંપતી હતું જે બહુ ઉત્કટતાથી પ્રાચીન કૈથેડરલ/ચર્ચની ઊર્જા અનુભવતું હતું. આ પ્રકારના ઘણા એમ્પૅથ કોઈ પણ પ્રકારની કુદરતી આપત્તિને પણ પહેલેથી અનુભવે છે.

આ પ્રકારની શક્તિ હોય તેના ફાયદા શું?

1) આધ્યાત્મિક પ્રગતિની શક્યતા ખૂબ સારી રહે કારણ કે પહેલેથી જ એક લેવલ તો આવી જ ગયું છે. સાધનાનું અનેકગણું પરિણામ આવી વ્યક્તિને મળી શકે.

2) બીજાની લાગણી સારી રીતે સમજી શકે, માટે તેના દૃષ્ટિકોણથી વિચારી શકે. પરિણામ એ આવે કે જે વ્યક્તિનું વર્તન ગુસ્સો અપાવે તેવું હોય તેને માટે પણ હમદર્દી જાગે. હકારાત્મક લાગણીઓ જન્મે. જેથી એમ્પૅથનાં વાઈબ્રેશન્સ વધુ સારાં થાય.

3) જૂઠનો સહારો લઈ કોઈ મૂર્ખ ન બનાવી શકે.

4) વિવિધ સંજોગોમાં યોગ્ય નિર્ણય લઈ શકાય.

5) નાનપણથી ‘સારું-ખરાબ, યોગ્ય-અયોગ્ય’ વિગેરે વિષે મનમાં ઘર કરી ગયેલી જડ માન્યતાઓને કારણે અનેક લોકો પોતાના માપદંડ બનાવી લે છે, જિંદગીભર અન્યને તેમ જ ખુદને પણ (પોતાનાં કૃત્યો, વિચારો વિગેરે માટે) ન્યાયાધીશ બની મૂલવતાં રહે છે, દંભનો સહારો લે છે; ગિલ્ટ, ઘૃણા જેવી લાગણીઓથી ઘેરાઈ જાય છે, તેનાં શારીરિક પરિણામો પણ ભોગવે છે. એમ્પૅથ બીજાના શરીરનાં સ્પંદનો જાણી શકતા હોવાને કારણે નોન-જજમેન્ટલ બની જાય છે. એક ઉદાહરણ લઈએ. કોઈ વ્યક્તિ (પુરુષ કે સ્ત્રી) પોતાની શારીરિક ઇચ્છાઓને વિકાર સમજતી હોય અને જાહેરમાં એવી કોઈ ચર્ચા વખત દંભમાં જતી હોય અને પરિણામે ગિલ્ટમાં જતી હોય – જો તે વ્યક્તિ એમ્પૅથ હોય તો તેને ખ્યાલ આવી શકે કે આ પ્રકારની શારીરિક સ્થિતિ તો અનેકની છે. જો તે ખ્યાલ આવે તો ગિલ્ટ ગયું? એ જ પ્રમાણે બીજી વ્યક્તિનાં કૃત્ય/માન્યતાઓ માટે ન્યાય તોળવાનું પણ બંધ? કારણ કે ખ્યાલ આવી જાય કે બીજાં અનેક લોકો પણ તે હરોળમાં છે જ, ફર્ક ફક્ત એટલો જ છે કે તે લોકો શાબ્દિક દંભ દ્વારા પોતાની આંતરિક સ્થિતિ છુપાવે છે.

એમ્પૅથ તરીકેની અતીન્દ્રિય શક્તિ હોવી તે જે તે વ્યક્તિ માટે મોટી ભેટ તો છે જ, પરંતુ સાથે-સાથે કોઈની નકારાત્મક ઊર્જાથી નુકસાન ન ભોગવવું પડે તે માટે તેણે અમુક સાવધાની રાખવી અત્યંત જરૂરી છે.

સાવચેતીનાં પગલાં

1. પહેલું કદમ તો એ છે કે ખુદની ઊર્જા વિષે ખ્યાલ હોવો. શું મારું છે અને શું કોઈનું ઉઠાવું છું તે સમજવું જરૂરી છે. સતત અવલોકન આ માટે જરૂરી છે. કોનાં સ્પંદન, કોની લાગણીઓ, કોની માન્યતાઓ મારામાં પ્રવેશી જાય છે તે પર ધ્યાન આપવું જરૂરી છે, જેથી આવા સંજોગોમાં સાવચેતી રાખી શકીએ.

2. એમ્પૅથ પાસે બે વિકલ્પ છે. પોતાને મળેલી મહામૂલી ભેટને ખરેખર ‘ભેટ’ સમજી તેનો ઉપયોગ કરવો, શું કાળજી રાખવી તે જાણવું, તે પ્રમાણે કાળજી રાખવી અને કુદરતનો આભાર માનવો કે બહુ ઓછા નસીબદાર માનવીઓમાંથી તે એક છે. બીજો વિકલ્પ એ છે કે આ ભેટને એટલે કે સંવેદનશીલતાને કોષતા રહેવું કે કારણ કે સંવેદનશીલતા સાથે અમુક શારીરિક/માનસિક તકલીફ પણ આવે કે જે બીજા પાસેથી ઉઠાવેલી હોય. જો ભૂલથી પણ બીજો વિકલ્પ એટલે કે નકારાત્મક લાગણીઓ ઘર કરી જાય તો તેનું નુકસાન એમ્પૅથને તેની સુપર-ડુપર સંવેદનશીલતાને કારણે વધારે ભોગવવાનું રહેશે.

3. એનર્જી વેમ્પાયર:

અનેક લોકો એવા હોય છે કે જે હંમેશા પોતાનાં રોદણાં જ રડતાં હોય છે. સાચી તકલીફ કરતાં પણ જીવન પ્રત્યેનો નકારાત્મક અભિગમ, બીજા પાસેથી સહાનુભૂતિ (કોઈ વાર ફાયદો) મેળવવાની વૃત્તિ તેમાં કામ કરતા હોય છે. આવા લોકો એમ્પૅથની ઊર્જા ચૂસી લે છે, તેને ખાલી કરી નાખે છે. એમ્પૅથ માટે જરૂરી છે કે તે ખરેખર તકલીફમાં હોય તેવી વ્યક્તિ અને આવા એનેર્જી વેમ્પાયરને જુદા તારવી શકે, વેમ્પાયરથી દૂર રહે, ફક્ત તેના માટે પ્રાર્થના કરી તેને પોતાના માનસપટલ પરથી દૂર કરી દે. તેણે પોતાની સીમા આંકી તેમાં કોને કેટલો પ્રવેશ આપવો તે નક્કી કરવું જોઈએ. અમુક સંબંધો છોડવા પડે તેમ પણ બને.

4. કોઈ પણ રીતે પોતાના માટે સમય કાઢી લેવો પડે – બીજાની ઊર્જા ઉઠાવી હોય તેની નોંધ લેવા, તેને વિદાય આપવા, પોતાની ઊર્જાને ફરી કાર્યાન્વિત કરવા.

5. શારીરિક કસરત દરેક માટે જરૂરી છે પરંતુ એમ્પૅથ માટે ખાસ.

6. જે વધારાનું કાર્ય શરીર કરી રહ્યું છે તેના સંતુલન માટે વધુ ઊંઘની જરૂર પડી શકે.

7. હિચકિચાટ વગર કોઈનું માર્ગદર્શન મેળવવું જોઈએ. ખુદમાં કોઈ વિશેષ શક્તિ હોવાનો અર્થ એ તો નથી કે દુનિયા મેરી મુઠ્ઠી મેં. જે આ વિષય સમજી શકતા હોય, સાઈકિક શક્તિ ધરાવતા હોય તેવા અનેક લોકો હશે જેમની સાથેનો સંપર્ક નવું શીખવશે.

8. કુદરતના ખોળે પહોંચી જવું શારીરિક અને માનસિક બંને રીતે સારું રહેશે. થોડા-થોડા સમયના અંતરે સમુદ્રસ્નાન, તે શક્ય ન હોય તો દરિયાનું મીઠું નાખેલ પાણીથી સ્નાન શરીરમાં પ્રવેશેલી નકારાત્મક ઊર્જાને દૂર કરવાનું કામ કરશે. ભૂમિ સાથેનો સંપર્ક એટલે કે ખુલ્લા પગે જમીન પર ચાલવું ફાયદાકારક રહેશે.

9. ક્રિસ્ટલ્સનો ઉપયોગ થઈ શકે તો સારું. સૂતી વખતે, ધ્યાન દરમ્યાન કે જયારે પણ જરૂર હોય ત્યારે ઊર્જાને સુરક્ષિત રાખવા માનસિક નિર્ધાર સાથે ક્રિસ્ટલ્સનો ઉપયોગ કરવાનો રહે. ક્રિસ્ટલ્સને સમયાંતરે સૂર્યપ્રકાશમાં, મીઠાનાં પાણીમાં શુદ્ધ કરવાં આવશ્યક રહેશે.

10. પાણી અને અન્ય પ્રવાહીનો જેટલો વધુ ઉપયોગ થઈ શકે તેટલું સારું.

11. નિયમિત ધ્યાન

જયારે ખબર જ છે કે બીજાની નકારાત્મક ઊર્જા પણ હું ઉઠાવું છું તો સ્વાભાવિક છે કે મારે મારી ઊર્જા વધારવા માટેના તમામ પ્રયત્નો કરવા જોઈએ. નિયમિત ધ્યાન અત્યંત જરૂરી રહેશે. કહેવત છે ને કે બેઠા-બેઠા તો રાજાના ખજાનો પણ ખાલી થઈ જાય. નવી ઊર્જા ભેગી ન કરીએ અને મૂળભૂત ઊર્જા બીજાની નકારાત્મક ઊર્જાનો છેદ ઉડાડવા માટે ખર્ચાતી જાય તો અંતે ઊર્જાના મામલે ભિખારી થવાની દશા આવે. એક વખતના નામી સંતો પણ જયારે આ પ્રમાણે ઊર્જા લૂંટાવે અને સામે નવી ઊર્જાનું પૂરતું ઉત્પાદન ન કરે તો તેમની સ્થિતિ પણ ખરાબ થઈ જાય છે (આ માર્ગદર્શન ઉચ્ચ કોટિના એક સંત તરફથી જ મળેલું છે.)

12. કોઈની પણ ઊર્જા સાથે વધુ ‘એટેચમેન્ટ’ ઘાતક સિદ્ધ થઈ શકે. વિરુદ્ધ લિંગની વ્યક્તિની ઊર્જા એમ્પૅથ વધારે પકડે છે. આ પ્રક્રિયા દરમ્યાન અમુક ઊર્જા એવી પણ હોય કે જે મનુષ્યસહજ વૃત્તિના પરિણામે માણવાનું મન થાય. આવા સંજોગોમાં માનસિક અંકુશ રાખવો અત્યંત જરૂરી છે.

વિષય ઘણો વિસ્તૃત છે. પરંતુ ક્લેયરએમ્પૅથી અંગેની ચર્ચા આ સાથે સમાપ્ત કરીએ છીએ. બીજી આવી શક્તિઓ વિષેની વાત હવે પછીના લેખમાં.

Categories: રસપ્રદ લેખો, વિજ્ઞાનની આંખે - અધ્યાત્મની પાંખે | Tags: , | Leave a comment

Blog at WordPress.com.