શામળીયે મારાં ચિત્ત ચોરી લીધાં,
વાલીડે વશ કીધાં રે –1
ગોવિંદ વિના ઘડી ના ગોડે,
હરિ હરિ કરીરે, હોઠે રે –2
ઘર ધંધામાં ધ્યાન નવ લાગે,
મોહનમાં મન ભાગે રે –3
સેવમાં સખી સૂંઠ જારી,
ખીર કીધી ખારી રે –4
દોણી વિના ગૌ દોવા બેઠી,
દૂધ ઢોળાતું ન દેખી રે –5
શિકે ચડાવતા બરણી ચૂકી,
બાળક દીધું મુકી રે –6
ભજનપ્રકાશ કહે માતા જશોદા તારે,
લાલે મન લીધાં લૂંટી રે –7
મોહનને હવે વાર માતાજી, તારા મોહનને હવે વાર
આવડી વ્રજમાં ધૂન મચાવે, નહીં કોઇ પૂછણહાર –માતાજી
સિક્કાં તોડે માટ ફોડે, મહિડાં ઢોળે ધરાર
છાના છાના વાછરૂ છોડે, મોરી સહેતા મોરાર –માતાજી
કાનો કાળો કેર કરે છે, રડાવે નાના બાળ
લાલાને બહુ લાડ ન કરીએ, સમજાવો લગાર –માતાજી
જુઠી નારી જુઠાં ન બોલો, મિથ્યા મુકો આળ રે
ભજનપ્રકાશનો સ્વામી સાચો, જુઠી વ્રજની નાર –માતાજી
ગાંડી રે ગોવાલણ હરિને વેચવા હાલી રે
લાલનસું એને લગની લાગી –ગાંડી
આતુરતા કારણ શરીરની શુધબુધ ભાગી
મહીને માટે મોરારને વેચવાને લાગી –ગાંડી
શેરીએ ને ગલીએ ગોપી સાદ પોકારે
માધવ લ્યો એમ નાદ ઉચ્ચારે –ગાંડી
મટૂકી ઉતારી માંહે મોરલી વાગી
દેખ્યા દામોદર શામળો સોહાગી –ગાંડી
ચૌદ ભુવનના સ્વામી એની મટૂકીમાં મ્હાલે
ભક્તોના દારિદ્ર દવ્યાં મારે વાલે –ગાંડી
ભજનપ્રકાશ ગુણ ગાવે ભક્તિ બીરદ બાને
પૂર્વની પ્રીતુ પાળી રાખ્યાં રૂડે વાને –ગાંડી
ગોપીને મુખડું જોયાનું નિત નેમ છે રે
એને પ્રીતમ થકી ઘણો પ્રેમ છે રે –ગોપીને
મુખ જોયા વિના ચેન નહીં ચિત્તમાં રે
એને દર્શન કરવા નિતનિતમાં રે –ગોપીને
વહેલા ઉઠી પ્રભાતે ઉતાવળી રે
જાવે જશોદા ઘેર બની બાવરી રે –ગોપીને
એના મનહર અંગોમાં ગોપી મોહીને રે
હૈયે હરખે જીવનને જોઇને રે –ગોપીને
ભજનપ્રકાશ ગોપી ભૂલી કામને રે
એતો જપે જીવનના નામ રે –ગોપીને
રાગઃ- તારા ઘરમાં પિયુ બિરાજે (દાસ સતારનું ભજન)
આ દેહમાં બેઠા દેવ મુરારી
ઇત ઉત મૂરખ શીદને ભટકે, જો તું ભીતર ભારી — ટેક
અજ્ઞાને અથડામાં મૂરખ, જ્યાં ત્યાં રાત અંધારી
તેજ રવિ કરે તારા તનમાં, જો તું આંખ ઉઘાડી –આ દેહમાં
સ્વપ્નું આવ્યું ચાલ્યું જાશે, પલની બાજી સારી
આવ્યો અવસર ઉઠ અભાગી, ભલી જીંદગી જો તારી –આ દેહમાં
ઘટ ઘટ સોઇ રામ રમતાં, સદગુરુ શબ્દ જો વિચારી
અહંકારની આંટી જાતાં, ઉઘડે અંતરબારી –આ દેહમાં
સાધુ સંત સમાગમ કરલે, લે જ્ઞાનની વાત વિચારી
ભજનપ્રકાશ ભવબંધન છૂટે, અંતર હોઇ ઉજીયારી –આ દેહમાં
અરે ઓ માનવી આવ્યો છે અહીં, તો કરીલે કમાઇ કહીં –ટેક
હીરો મળ્યો છે તે હારીશ નહી, કાચને બદલે વેચીશ નહીં
મિથ્યા મોતીનો રંગ જોઇને, ચળકાટે છેતરાઇશ નહીં –1
વિવેક વિનાની વણજુ કરીને, ગાંઠનું ગરથ ગુમાવીશ નહીં
ધુતારાના ધન થકી તું, લાલચમાં લપટાઇશ નહીં –2
અસલ વસ્તુ આવી મળી, ખોટે માર્ગે ખરચીશ નહીં
ભજનપ્રકાશ મૂલ્ય સવાયાં મળશે, ભલા લાભને ભૂલીશ નહીં-3
રે મન ગુણ ગોવિંદના ગાતા, તું કદી શરમાઇશ નહી
મળ્યુ અમૂલખ મોતી તને, ગાફીલપણે ગુમાવીશ નહીં –ટેક
આ સંસારે આવતા જાતાં, મળ્યું મોંઘુ મોતી કંઇ
જાળવજે એને જતનથી તો, દારિદ્ર આવશે નહીં –1
વિગતથી વટાવી ખાજે, તો સુખ આપશે સહી
ખરચતાં પણ ખૂટશે નહીં, નિત નિત વધશે તહીં –2
ભજનપ્રકાશ માનવ તન મોંઘો, જોતાં જડશે નહી
ભજન કરી ભવસાગર તરજે, અવસર ફરી આવે નહી –3
રાગઃ- હે જગજનની હે જગદંબા
હે અવિનાશી દીન દયાળુ, અરજી અમારી સાંભળી લેજે –ટેક
ભલે કોઇ માગે વિત સુત દારા, સાથે મહેલ સંપતિ અપારા
શાંતિ વિનાનું કશું ન ચાહું, દેજે સમજણના વિચારો સારા –1
ઉઠી વેલો આરાધું તુજને, નિજ કર્તવ્યની મતિ દેજે મુજને
પરહિતે ભલે પિંડ આ પડતું, અડગ દેજે એવી સુઝને –2
નિત નિત ચાહુ સંત સમાગમ, સંતોમાં મને પ્રિતી દેજે
અધિકારી બનાવી આપનો, તારો બની વિચરવા દેજે –3
ભલો બુરો ભલે કહે કોઇ મુજને, ક્ષમવાની મને શક્તિ દેજે
નિંદા સ્તુતિ હું કરૂં નહીં કોઇની, મીઠા બોલ મને બોલવા દેજે-4
ભલે કદી પ્રભુ તું ભુલીજા મુજને, મને સદા તારું સ્મરણ દેજે
ભજનપ્રકાશ નિત રહે તારી છાયા, આ વાતોનું વરદાન દેજે –5
ભજનામૃત + અમૃતવાણી 