Daily Archives: 07/10/2008

સતનું સાંડીડું ચલાવીએ – (4)

સતનું સાંડીડું ચલાવીએ,

કાયાના કારીંગાને કાઢીએ — ટેક

ધરમના ધોરીરે જોતરીએ,

હેતના હળને હંકારીએ — ૧

ઓરાણી અલખના નામની બાંધીએ,

જુગતીથી ભક્તિના બીજ વાવીએ — ૨

મોસમ ઉગીને ખેતર ખીલ્યાં,

મન બહું મમતામાં મલ્યાં — ૩

કામક્રોધ નિંદામણ નિરાળીએ,

કરમના કણસલા કાઢીએ — ૪

ધીરજના મેળા મોટા માંડીએ,

રૂડી રીતે રખોપા રાખીએ — ૫

ગોફણજ્ઞાન ગોળા ચલાવીએ,

સંશય બીહંગ ઉડાડીએ — ૬

મોસમ પાકીને ઢીલ નવ ધરીએ,

મુક્તાફળ ભજનપ્રકાશ લણીએ — ૭ 

Categories: ભજન / પદ / ગીત / કાવ્ય / ગઝલ | Leave a comment

એજી જેનો પિયુજી વસે પરદેશ (3)


એજી જેનો પિયુજી વસે પરદેશ, એને નેણે નિંદ નાવે રે — ટેક

હોયજો પદમણી પતિવ્રતા નાર, એને દહાડા દોયલા જાવે રે — ૧


એજી એને શૂળી સમ સુની હોય સેજ, અંતર ઘણું અકળાતી રે

જીવન ભાસે સઘળું ઝેર, દીલે બહુ દુભાતી રે — ૨


એજી વિરહે વિતાવે દોહલા દિન, આંખે આંસુની હેલી રે

અંતર આગ બળે અપાર, ઘુમે થઈ ધણી ઘેલી રે — ૩


એજી એ વાતુ જાણે કોઈ વ્રજનાર, પ્રીતુની રીતુ પારખે રે

દુરિજન દાઝે દીલમાંય, હાંસી કરે હરખે રે — ૪


એજી જોશું જીવનભર જીવનની વાટ, મોહન આવી મળજો રે

ભજનપ્રકાશ ભરોસે ભગવાન, દાસીના દુઃખને હરજો રે — ૫   

Categories: ભજન / પદ / ગીત / કાવ્ય / ગઝલ | Leave a comment

Create a free website or blog at WordPress.com.