તુ પુછી જો પંડના તારા પાપ (2)

તુ પુછી જો પંડના તારા પાપ

પંડના તારા પાપ, તારૂં દિલડું દેશે જવાબ — ટેક

હૈયું ખોલી જોજે તારા, મનનું કાઢી માપ

બહુનામી બતાવશે, તારાં કરેલા સઘળા પાપ — 1

પરાયાને પીડા કરીને,  ઉપજાવતો સંતાપ

પાપ કરવામાં પાછું ફરીને, જોયું નહીં કદી બાપ — 2

શાંતિના ઘરમાં લાય લગાડી, બીજાને બાળતો બાપ

ગરીબોને દુ:ખ દઈને, રડાવતો દિન રાત — 3

ક્રોધમાં રાતો-માતો થઈને, બનતો કાળો સાપ

કાળાં કરમ કરવામાં તે, નહોતું રાખ્યું માપ — 4

ગરીબોની હાય લીધી, હૈયાં બાળ્યાં અમાપ

ભજનપ્રકાશ કહે બહુ ભુંડાઈ કીધી, હવે શાને પસ્તાય — 5

ગણપતિ વંદના (1)

ગુણપતિ દાતા દેવ દયાળા, સમરૂં દેવ સુંઢાળા એજી — ટેક

માતા તમારા પાર્વતિને, પિતા શંકર દેવા — એજી

વિઘન વિનાશક દેવ દાતા, દુખ હરજો દયાળા — 1

પહેરણ પિતાંબર અંગે સોહાવે, માથે મુગટ મોતીવાળા

મનહર મૂરતી નેણે નીરખતાં, મન મોહે મચકાળા — 2

ધૃત સિંદોરની સેવા ચડે ને, કંઠે ફુલનકી માળા

કર આયુધ ફરસી બિરાજે, શૂરવીર મહા શૂરાળા — 3

સર્વગુણ સંપન્ન સ્વામી તમે છો, ગુરૂદેવ જ્ઞાનના જ્ઞાતા

ભજનપ્રકાશને શુધ્ધબુધ્ધ દેજો, દીનબંધુ દયાળા — 4